ނ. އަތޮޅު މަދަރުސާގެ ދަރިވަރުންނަށް ކުރިއަށް ގެންދިޔަ ޓްރެފިކް މޮނީޓާސް ޕްރޮގްރާމް ނިންމުމުގެ ރަސްމިއްޔާތު ބާއްވައިފިއެވެ.

މަނަދޫގައި އޮކްޓޫބަރު 24 ވަނަ ދުވަހު ބޭއްވި މި ރަސްމިއްޔާތު ޝަރަފުވެރިކޮށްދެއްވީ ހެޑް އޮފް އޮފީސް އޮފް ދަ ކޮމިޝަނަރ، އެސިސްޓެންޓް ކޮމިޝަނަރ އޮފް ޕޮލިސް މޫސާ ޢަލީއެވެ. މި ރަސްމިއްޔާތުގައި، ރޯޑް ސޭފްޓީ އެވެއާނަސް އެންޑް ޕްރިވެންޝަން ހެޑް، ސުޕްރިންޓެންޑެންޓް އޮފް ޕޮލިސް އަޙްމަދު ފަސީހް، ނ. އަތޮޅު ކޮމާންޑަރު އިންސްޕެކްޓަރ އޮފް ޕޮލިސް ޝުޢައިބް ޢަބްދުއްރަހްމާން އަދި ނ. އަތޮޅު މަދަރުސާގެ އިސްވެރިން ބައިވެރިލެއްވިއެވެ.

މި ރަސްމިއްޔާތު ޝަރަފުވެރިކޮށްދެއްވައި އެސިސްޓެންޓް ކޮމިޝަނަރ އޮފް ޕޮލިސް މޫސާ ޢަލީ ދެއްކެވި ވާހަކަފުޅުގައި، ޓްރެފިކް މޮނީޓާސް ޕްރޮގްރާމް ނިންމި ދަރިވަރުންނަށް މަރުހަބާ ދެންނެވިއެވެ. އަދި ޕްރޮގްރާމުގެ ތެރެއިން ދަސްކުރި ކަންކަން ހެޔޮގޮތުގައި ބޭނުންހިފައި ނަމޫނާ ދަރިވަރުންތަކަކަށް ވުމަށް އެދިލެއްވިއެވެ. ހަމަ އެހެންމެ ސައިބަރ ކްރައިމްގެ މައްސަލަތަކުން ރައްކާތެރިވެތިބުމަށާއި ރައްކާތެރިގޮތުގައި އިންޓަނެޓު ބޭނުންކުރުމަށް ދަރިވަރުންނަށާއި ބެލެނިވެރިންނަށް އިލްތިމާސްކުރެއްވިއެވެ.

ރޯޑް ސޭފްޓީ އެވެއާނަސް އެންޑް ޕްރިވެންޝަނާއި މަނަދޫ ޕޮލިސް އަދި ނ. އަތޮޅު މަދަރުސާ ގުޅިގެން އޮކްޓޫބަރު 19 އިން ފަސްދުވަހުގެ މުއްދަތަށް ކުރިއަށް ގެންދިޔަ ޓްރެފިކް މޮނީޓާސް ޕްރޮގްރާމުގައި ނ. އަތޮޅު މަދަރުސާގެ ގްރޭޑް 8، 7، 6 ގެ 35 ދަރިވަރުން ބައިވެރިވިއެވެ.

މި ޕްރޮގްރާމުގައި ބައިވެރިވި ދަރިވަރުންނަށް ޓީމް ބިލްޑިންގ ހަރަކާތްތަކާއި، މަސައްކަތުގައި ކާމިޔާބު ހޯދުމަށްޓަކައި މޯޓިވޭޝަނަލް ސެޝަނެއް ކުރިއަށް ގެންގޮސްފައިވެއެވެ. އަދި އާންމުންނާ ބައްދަލުވެ ވާހަކަދެއްކުމުގައި އަދި އާންމު ދިރިއުޅުމުގައި ވެސް ބަސްމަގު ބަހައްޓަންވީގޮތްތައް ކިޔައިދިނުމަށްޓަކައި ކޮމިއުނިކޭޝަން ސްކިލް ސެޝަނަކާއި، ދިމާވާ ހާލަތަކުން ސަލާމަތްވުމަށް ބޭނުންވާ ބޭސިކް ސެލްފް ޑިފެންސް އުކުޅުތައް ދަސްކޮށްދީފައިވެއެވެ.

އޭގެ އިތުރުން، މަގުމަތީގެ ގަވާއިދުތަކަށް އަހުލުވެރިކުރުވުމަށް ގާނޫނާއި ގަވާއިދުތައް ކިޔައިދީ، މަގުމަތީގައި ދިމާވާ ހާދިސާތަކުން ސަލާމަތްވުމަށް ސަމާލުކަން ދޭންޖެހޭ ކަންކަމާއި، ޓްރެފިކް މޮނިޓަރުންގެ ރޯލުތަކާއި، ޓްރެފިކް ސައިންތަކާއި، ލައިސަންސް ނަގައިގެން ދުއްވަން ކަނޑައެޅިފައިވާ އުސޫލުތަކުގެ އިތުރުން ސިއްހީ ކުއްލި ހާލަތެއްގައި އަވަސް ފަރުވާ ދިނުމަށްޓަކައި ކުރަންޖެހޭ ކަންކަން ކިޔައިދީފައިވެއެވެ.

މި ޕްރޮގްރާމް ކުރިއަށް ގެންދިއުމަށްޓަކައި ނ. އަތޮޅު މަދަރުސާގެ ޕްރިންސިޕަލާއި މުދައްރިސުންގެ ފަރާތުން ވަރަށް ފުރިހަމަ އެއްބާރުލުމެއް ލިބިފައިވެއެވެ.

ޓްރެފިކް މޮނީޓާސް ޕްރޮގްރާމުގެ އިތުރުން، ނ. އަތޮޅުގައި މަސައްކަތްކުރާ ބައެއް ފުލުހުންނާއި، އާންމު ރައްޔިތުންނަށް ވެސް މައުލޫމާތުދީފައިވެއެވެ. އެގޮތުން އެއްގަމު ދަތުރުފަތުގެ ގާނޫނަށް އަހުލުވެރިކުރުވުމަށް މަނަދޫ، ޅޮހި އަދި މާޅެންދޫގައި މައުލޫމާތުދިނުމުގެ ސެޝަންތައް ކުރިއަށް ގެންގޮސްފައިވެއެވެ.