ބަންގުލަދޭޝްގެ ރައްޔިތަކު ގާނޫނާއި ގަވާއިދާ ހިލާފަށް ދިވެހިރާއްޖެއަށް ބިދޭސީން ގެނައުމުގެ ވިޔަފާރިކޮށް ޖިނާއީ ކުށްކޮށްގެން ފައިސާ ހޯދައި މަނީލޯންޑްރިންގ އަމަލުތަކެއް ހިންގާފައިވާ މައްސަލައިގެ ތަހުގީގު ނިންމައި ދައުވާކޮށްދިނުމަށް އެދި ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ.
މި މައްސަލައާ ގުޅިގެން ފުލުހުންގެ ތަހުގީގު ނިންމައި ދައުވާކުރުމަށް ފޮނުވާފައިވަނީ ޝަހާދަތު ހޮސައިން، ބަންގްލަދޭޝް، (34އ) ގެ މައްޗަށެވެ. މީނާ ހައްޔަރުކޮށްފައިވަނީ 2025 ޖަނަވަރީ 21 ވަަނަ ދުވަހު ކޯޓު އަމުރުގެ ދަށުންނެވެ.
ޝަހާދަތު ހޮސައިންއަކީ 2014 ވަނަ އަހަރުން ފެށިގެން ހަތަރު ވޯކްޕާމިޓެއްގައި ދިވެހިރާއްޖޭގައި އުޅެމުން ގޮސްފައިވާ މީހެއްކަން ތަހުގީގުގެ ތެރެއިން ދެނެގަނެވިފައިވެއެވެ. އަދި އޭނާ ގެންގުޅޭ މޯބައިލް ފޯނާއި ލެޕްޓޮޕްގައި އެކި ކުންފުނިތަކުގެ ރަޖިސްޓްރީއާއި ލޯގޯ، ސްޓޭމްޕް އަދި ބިދޭސީން ހިމެނޭގޮތަށް އެކި މީހުންގެ ސޮއި އަދި ވޯކްޕާމިޓާއި ކޯޓާ ނެގުމަށް ބޭނުންވާ ލިޔެކިޔުމުގެ އިތުރުން ބިދޭސީންގެ ޕާސްޕޯޓު ކޮޕީއާއި ބައެއް ދިވެެހިންގެ އައިޑީކާޑު ފޮޓޯ ވެސް ފެނިފައިވެއެވެ. މީގެ އިތުރުން، ވޯކްޕާމިޓް ސައިޓުތަކަށް ވަދެފައިވާކަމުގެ ވެބް ހިސްޓްރީ ވެސް ތަހުގީގަށް ލިބިފައިވެއެވެ.
