މޯލްޑިވްސް އިމިގްރޭޝަންގައި މަސައްކަތްކުރާ ބައެއް މުވައްޒަފުން، އެ އިދާރާގައި އަމަލުކުރަމުންދާ އުސޫލުތަކާ ހިލާފަށް ބިދޭސީންގެ އަތުން ނާޖާއިޒު މަންފާ ހޯދަމުންދާކަމަށް ލިބުނު މައުލޫމާތާ ގުޅިގެން ފުލުހުން ތަހުގީގުކުރި މައްސަލައިގެ ތަހުގީގު ނިންމައި ދައުވާކޮށްދިނުމަށް އެދި ޕްރޮސިކިއުޓަރ ޖެނެރަލްގެ އޮފީހަށް ފޮނުވައިފިއެވެ.
މައްސަލައިގެ ތަހުގީގު ނިންމައި ޕްރޮސިކިއުޓަރ ޖެނެރަލްގެ އޮފީހަށް ފޮނުވާފައިވަނީ 2025 މެއި 11 ވަނަ ދުވަހުއެވެ. މި މައްސަލައާ ގުޅިގެން ދައުވާކޮށްދިނުމަށް އެދި ފޮނުވާފައިވަނީ ގ. ލިޓޯނިއާ / މާލެ، މުޙައްމަދު ޝަމްޢާން ވަޙީދު (36އ) އާއި މޫނިމާގެ / ތ. ބުރުނި، މުޙައްމަދު އަލްސަން އިސްމާޢީލް (21އ) އާއި ގ. ހެޕީސައިޑް / މާލެ، އިބްރާހީމް އަޙްމަދު (37އ) އާއި ގ. ހެޕީސައިޑް / މާލެ، ޙަސަން ސަހެޝާން (47އ) އަދި މ. ހަޒާރީވިލާ / މާލެ، އަޙްމަދު ލައްސާނު (40އ) ގެ މައްޗަށެވެ.
މި މައްސަލައާ ގުޅޭ މައުލޫމާތު ފުލުހުންނަށް ލިބިފައިވަނީ 2025 މާރިޗު 20 ވަނަ ދުވަހުއެވެ. މައްސަލައިގެ ތުހުމަތުގައި އެ ފަސް މީހުން ކޯޓު އަމުރުގެ ދަށުން ހައްޔަރުކޮށް، އެ މީހުންނާ ގުޅުންހުރި ތަންތަނާއި ތަކެތި ބަލައި ފާސްކޮށް އަދި އެހެނިހެން ގޮތްގޮތުން ވެސް މައްސަލައާ ގުޅޭ ހެކި ގަރީނާ ހޯދާފައިވެއެވެ. އެގޮތުން، މި މައްސަލަ ތަހުގީގުކޮށް މިހާތަނަށް ބެލިބެލުމުން، މި ކަމަކީ ދުރާލާ ރޭވިގެން ހިންގާފައިވާ ކުށުގެ އަމަލެއްކަން އެނގިފައިވެއެވެ.
