ފުލުހުންގެ ހިދުމަތަކީ ރައްޔިތުންގެ ތެރެއިން ދެވޭ ހިދުމަތެއް ކަމަށާއި ފުލުހުންގެ ހިދުމަތަކީ ހިތްވަރާއި ކެރުމާއި، ގައުމަށް ލޯތްބެއް އޮވެގެން އަދި ދިވެހި ރައްޔިތުންނަށް ހިދުމަތްކުރުމުގެ އާދަޔާ ހިލާފު ވިސްނުމެއް ހުރެގެން މެނުވީ ކުރެވޭނެކަމެއް ނޫންކަމަށް، ދާހިލީ ސަލާމަތާއި ފަންނިއްޔަތާ ބެހޭ ވަޒީރު އޮނަރަބަލް ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ، 40 ވަނަ ފުލުހުންގެ އަސާސީ ތަމްރީނު ކޯހުގެ ދަސްވެނިވެ ހިނގާލުމުގެ ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަަކަފުޅުގައެވެ. ވަޒީރު އިތުރަށް ވިދާޅުވީ މިއީ ގައުމެއް ކުރިއަށް ދިއުމަށް އެ ގައުމެއްގައި އޮންނަންޖެހޭ މުހިންމު އަސާސްތަކެއް ހިފަހައްޓާ މުއައްސަސާއެއްގެ ހިދުމަތް ކަމުގައެވެ. އަދި ގައުމެއްގެ ސަލާމަތާއި ރައްކާތެރިކަމާއި ގައުމެއްގައި އޮންނަންޖެހޭ ހަމަޖެހުން ހިފެހެއްޓުމުގެ ފުރިހަމަ ޒިންމާ ފުލުހުންގެ ބޮލުގައި އެޅިފައިވާކަމަށް ވިދާޅުވިއެވެ.

މި ރަސްމިއްޔާތުގެ ދަސްވެނިންނަށް މަރުހަބާ ދަންނަވައި ވާހަކަފުޅުދައްކަވަމުން ވަޒީރު ވިދާޅުވީ، ފުލުހުންގެ ވަޒީފާގައި ތެދުވެރިކަމާއެކު މަސައްކަތް ކުރުމަކީ މިޒަމާނުގައި ޗެލެންޖެއް ގޮތަށް ނަގަންޖެހޭކަމެއް ކަމަށާއި ކޮންމެ ފުލުހަކު ވެސް އަޒުމް ކަނޑައަޅަންޖެހެނީ ތެދުވެރިކަމާއެކު މަސައްކަތް ކުރުމަށްކަމަށް ވިދާޅުވިއެވެ. އަދި ފުލުހުން ލޯތްބާއި އިހުތިރާމާއެކު ރައްޔިތުންނަށް ޚިދުމަތް ދިނުމަށް އެމަނިކުފާނު ގޮވައިލެއްވިއެވެ.

ފުލުހުންގެ ހިދުމަތުގައި ގައުމަށް ހިދުމަތްކުރުމަކީ ފަސޭހަކަމެއް ނޫންކަން ފާހަގަކުރައްވައި ވަޒީރު ވިދާޅުވީ، މިއީ ހިތްވަރާއި ކެރުން ހުރެގެން، ގައުމަށް ލޯތްބެއް ހުރެގެން އަދި ދިވެހި ރައްޔިތުންނަށް ހިދުމަތްކުރުމުގެ އާދަޔާ ހިލާފު ރޫހެއް ހުރެގެން ކުރެވޭނެކަމެއް ކަމަށެވެ. އަދި ތިމާގެ ދަރިއަކު ފުލުހުންގެ ހިދުމަތަށް ނެރެދެއްވުމަށް ތިމާއާ ދުރަށް، ކޯސް ފުރިހަމަކުރުމަށް ފޮނުވުމަކީ ބެލެނިވެރިއަކަށް ގައުމަށްޓަކައި ކޮށްދެވޭ ވަރަށް މުހިންމު ގައުމީ ހިދުމަތެއް ކަމުގައި ވެސް ވަޒީރު ފާހަގަކުރެއްވިއެވެ.

އަދި ފުލުހުންގެ އަސާސީ ތަމްރީނު ފުރިހަމަކޮށް، ނިންމައިލެވޭ ދުވަހަކީ ހަނދާނުން ފުހެލަން އުނދަގޫ ދުވަހަކަށް ވާނެކަމަށާއި މި ދުވަހަކީ ގައުމަށް ހިދުމަތްކުރުމަށް އަޒުމް ކަނޑައަޅައި، އާ ދިރިއުޅުމަކަށް ފިޔަވަޅު އަޅާ ދުވަހެއް ކަމަށް ވެސް ވަޒީރު ޢަލީ އިޙްސާން ވިދާޅުވިއެވެ.