ކުށްމަދު އަމާން މުޖުތަމައެއް ބިނާކޮށް ވިޔަފާރިވެރިން ޒިންމާދާރުކުރުވައި ހޭލުންތެރިކުރުވުމަށް ފުލުހުން ކުރަމުންގެންދާ މަސައްކަތްތަކުގެ ތެރެއިން ފ. ބިލެތްދޫ ފިހާރަތަކަށް ޒިޔާރަތްކޮށް މައުލޫމާތު ދިނުމުގެ ޕްރޮގްރާމެއް ކުރިއަށް ގެންގޮސްފިއެވެ.

މި މަހު 11 ވަނަ ދުވަހު ބިލެތްދޫ ޕޮލިހުން ކުރިއަށް ގެންދިޔަ މި ޕްރޮގްރާމްގައި، ކުށްތަކުން ރައްކާތެރިވެތިބުމަށް ވިސްނަންޖެހޭ ކަންކަމާއި މުޖުތަމައުގައި މިހާރު އާންމުވަމުންދާ ކުށްތަކާ އަދި އެ ކުށްތަކުން ތިމާއާއި އެހެން މީހުން ރައްކާތެރިކުރާނެ ގޮތްތަކުގެ މައުލޫމާތު ހިއްސާކޮށްފައިވެއެވެ. އަދި ފައިސާ ގެންގުޅުމުގައި ސަމާލުކަންދޭންވީ ކަންކަމުގެ އިތުރުން މުދާ ވިއްކުމަށްފަހު އެކައުންޓަށް ފައިސާ ފޮނުވާއިރު އިތުރަށް ސަމާލުކަންދޭންޖެހޭ ކަންކަން ބުނެދީ އެކަމަށް ހާއްސަ ސަމާލުކަމެއް ދިނުމަށް ވިޔަފާރިވެރިންނަށް ނަސޭހަތްތެރިވެފައިވެއެވެ. އަދި އެކައުންޓާށް ފައިސާ ޖަމާވިތޯ ޔަގީންކުރުމަށާއި ފައިސާ ޖަމާވުމުން ނޫނީ މުދާ ހަވާލުނުކުރުމަށާއި މަކަރާއި ހީލަތުން ފައިސާ ހޯދުމަށް އަންނަ ކޯލުތަކަށް ސަމާލުކަންދިނުމަށް ވެސް ނަސޭހަތްތެރިވިއެވެ.

އޭގެ އިތުރުން، ވިޔަފާރި ބަންދުކޮށްފައި ދާއިރު ރައްކާތެރިކަމެއް ނެތްގޮތަށް ފައިސާ ނުބެހެއްޓުމަށާއި، ފިހާރަ ތަޅުލެވުނުކަން ޔަގީންކުރުމަށާއި ފިހާރަ ތެރޭގައި އަލިކަން ބެހެއްޓުމަށް އިރުޝާދުދީފައިވެއެވެ. އަދި ފިހާރަތަކުގެ ސަލާމަތާއި ރައްކާތެރިކަމަށް ސީސީޓީވީ ކެމެރާ ހަރުކުރުމުގެ މުހިންމުކަން ބުނެދީފައިވެއެވެ. މީގެ އިތުރުން ސްކޭމް މައްސަލަތަކަކީ ކޮބައިކަމާއި އެފަދަ މައްސަލަތަށް ހާއްސަ ސަމާލުކަމެއްދީ ހޭލުންތެރިކުރުވުމަށް މައުލޫމާތު ދީފައިވެއެވެ.