ކުށުން ރައްކާތެރިކުރުމަށް މައުލޫމާތު ދިނުމުގެ ހަރަކާތްތަކެއް ގދ. ރަތަފަންދޫގައި ކުރިއަށްގެންގޮސްފިއެވެ.

މި ޖަނަވަރީ މަހުގެ 11 އިން ފެށިގެން އެކި ދުވަސް މަތިން މި ހަރަކާތްތައް ކުރިއަށް ގެންގޮސްފައިވަނީ ރަތަފަންދޫ އަވައްޓެރި ފުލުހުންނެވެ. މި ހަރަކާތްތަކުގައި، ރަށުގެ ފިހާރަތަކާއި ގޭބިސީތަކަށް ޒިޔާރަތްކޮށް އަދި އުމުރުން ދުވަސްވީ މީހުންނާ ބައްދަލުކޮށް މައުލޫމާތު ދީފައިވެއެވެ.

އެގޮތުން، ގެއިން ބޭރަށްދާ ވަގުތުތަކުގައި ގޭގެ ދޮރުތައް ތަޅުލެވުނުކަން ޔަގީންކުރުމަށާއި، މަކަރާއި ހީލަތުން ފައިސާ ހޯދުމަށް އަންނަ ފޯނުކޯލުތަކަށް ޖަވާބު ނުދިނުމަށާއި ގޮތް ނޭނގޭ ލިންކުތަކަށް ނުވަނުމަށާ އަދި ޒާތީ މައުލޫމާތާއި ބެންކު އެކައުންޓާއި ކޭޝްކާޑުގެ މައުލޫމާތު ގޮތް ނޭނގޭ އެއްވެސް މީހަކާ ހިއްސާނުކުރުމަށް ނަސޭހަތްތެރިވެފައިވެއެވެ.

އަދި ފިހާރަތަކަށް ޒިޔާރަތްކޮށް، ވިޔަފާރިވެރިން ސަމާލުކަން ދޭންވީ ކަންކަމާ ގުޅޭގޮތުން މައުލޫމާތު ދީފައިވެއެވެ. އެގޮތުން، ފިހާރަތަކުގައި ސީސީޓީވީ ކެމެރާ ހަރުކުރުމުގެ މުހިންމުކަން ކިޔައިދީފައިވެއެވެ. އަދި ހަރުކޮށްފައި ހުރި ކެމެރާތައް ރަނގަޅަށް މަސައްކަތްކުރޭތޯ ބެލުމަށާއި ތުހުމަތުކުރެވޭ ކަމެއް ފާހަގަކުރެވިއްޖެ ނަމަ ފުލުހުންނަށް ރިޕޯޓުކުރުމަށް އިލްތިމާސްކޮށްފައިވެއެވެ.