ކުށްމަދު އަމާން މުޖުތަމައެއް ބިނާކޮށް ރައްޔިތުންނަށް ސަލާމަތާއި ރައްކާތެރިކަން ކަށަވަރުކޮށްދިނުމަށާއި ގެސްޓްހައުސްތަކުގެ ވެރިން ހޭލުންތެރިކުރުވުމަށް މައުލޫމާތު ދިނުމުގެ ޕްރޮގްރާމެއް ހދ. ހަނިމާދޫގައި ކުރިއަށް ގެންގޮސްފިއެވެ.

މި މަހު 25 އިން 26 އަށް ކުރިއަށްގެންދިޔަ މި ޕްރޮގްރާމަކީ ފަތުރުވެރިންނަށް ހިދުމަތް ފޯރުކޮށްދޭ ފަރާތްތަކަށް ކޮންމެހެން އެނގެންޖެހޭ ގާނޫނުތަކާއި ގަވާއިދުތަކާ ގުޅޭ މައުލޫމާތު ހިއްސާކޮށް ފަތުރުވެރިންނަށް ކުރިމަތިވާ އެކި ކަންކަމުގައި އަމަލުކުރަންޖެހޭ އުސޫލުތަކަށް ހޭލުންތެރިކުރުމަށް ކުރިއަށް ގެންދިޔަ ޕްރޮގްރާމެކެވެ.

މި ޕްރޮގްރާމުގައި، ރަށުތެރޭގައި އުޅޭއިރު ފަތުރުވެރިންގެ ކިބައިން ފެންނަމުންދާ އާންމު އިޖުތިމާއީ މިންގަނޑުތަކާ ހިލާފު އަމަލުތައް ހުއްޓުވައި އަދި މިފަދަ ކަންކަން ފަތުރުވެރިންގެ ސަމާލުކަމަށް ގެނެސްދިނުމަށް މައުލޫމާތު ދީފައިވެއެވެ. އަދި ގެސްޓްހައުސްތަކުގެ ސަލާމަތާއި ރައްކާތެރިކަމަށް ކުރެވިދާނެ ކަންކަމާއި ފަތުރުވެރިންނަށް ހިދުމަތް ފޯރުކޮށްދިނުމަށް ގެންގުޅޭ އާލާތްތަކުގެ ސަލާމަތީ ކަންކަން ކަށަވަރުކުރުމަށް ވެސް މައުލޫމާތު ހިއްސާކޮށްފައިވެއެވެ.

މީގެ އިތުރުން، ފަތުވެރިންނާއި ގެސްޓްހައުސް ހިދުމަތް ފޯރުކޮށްދޭ ފަރާތްތައް ހޭލުންތެރިކުރުވައި ރައްކާތެރިކަމަށް އަހުލުވެރިކުރުވުމަށް ދެފަރާތުން ގުޅިގެން ކުރެވޭނެ ކަންކަމާ ގުޅޭގޮތުން މަޝްވަރާކޮށްފައިވެއެވެ.