ބ. ކިހާދޫގައި ގެސްޓުހައުސް ހިންގާ ފަރާތްތަކާ ބައްދަލުކޮށް މައުލޫމާތު ދިނުމުގެ ހަރަކާތެއް ކުރިއަށް ގެންގޮސްފިއެވެ. އެ ރަށު ޕޮލިސް ޕޯސްޓުން ކުރިއަށް ގެންދިޔަ މި ހަރަކާތަކީ ކުށްމަދު އަމާން މުޖުތަމައެއް ބިނާކޮށް ރައްޔިތުންނަށް ރައްކާތެރިކަން ކަށަވަރުކޮށް އަދި ހޭލުންތެރިކުރުވުމަށް މައުލޫމާތު ދިނުމަށް ފުލުހުން ކުރަމުންގެންދާ މަސައްކަތްތަކުގެ ތެރެއިން ކުރިއަށް ގެންދިޔަ ހަރަކާތެކެވެ.

މި މަހު 3 ވަނަ ދުވަހު ކުރިއަށް ގެންދިޔަ މި ހަރަކާތުގައި، ޓޫރިސްޓު ހިދުމަތް ފޯރުކޮށްދޭ ފަރާތްތައް ގާނޫނުތަކާއި ގަވާއިދުތަކަށް އަހުލުވެރިކުރުވައި، ފަތުރުވެރިންނަށް ކުރިމަތިވާ އެކި ކަންކަމާ ގުޅޭގޮތުން އަމަލުކުރަންޖެހޭ އުސޫލުތަކަށް ހޭލުންތެރިކުރުވުމަށް މައުލޫމާތު ދީފައިވެއެެވެ. އެގޮތުން، ގެސްޓްހައުސްތަކުގެ ސަލާމަތީ ކަންކަމާއި ފަތުރުވެރިންގެ ސަލާމަތާއި ރައްކާތެރިކަން ކަށަވަރުކުރުމަށް އެޅިދާނެ ފިޔަވަޅުތަކާ ގުޅޭގޮތުން މައުލޫމާތު ހިއްސާކޮށްފައިވެއެވެ. އަދި އާންމު އިޖުތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގެ ގާނޫނުގައިވާ ކަންކަމާ ގުޅޭގޮތުން މައުލޫމާތުދީ އަދި ފަތުރުވެރިންގެ ފަރާތުން ފެންނަ އާންމު އިޖުތިމާއީ މިންގަނޑުތަކާ ހިލާފު ކަންކަން ހުއްޓުވުމަށް މަސައްކަތްކުރުމަށާއި އާންމު ތަންތަނުގައި ހެދުން އަޅަންޖެހޭ މިންގަނޑު ފަތުރުވެރިންނަށް އަންގައިދިނުމަށް މައުލޫމާތު ދީފައިވެއެވެ.

މީގެ އިތުރުން، މީހުން ދިރިއުޅޭ ރަށްރަށުގައި ޗުއްޓީ ހޭދަކުރާ ފަތުރުވެރިންނާ ހިއްސާކުރަންޖެހޭ މައުލޫމާތާތުތައް ހިއްސާކުރުމަށާއި ގެސްޓުހައުސްތަކުގެ ސަލާމަތާއި ރައްކާތެރިކަމާއި ފަތުރުވެރިންގެ ރައްކާތެރިކަމަށް ގެސްޓުހައުސް ހިނގާ ފަރާތްތައް ހޭލުންތެރިކުރުވައި އަހުލުވެރިކުރުވުމަށް ދެފަރާތުން ގުޅިގެން ކުރެވިދާނެ ކަންކަމާ ގުޅޭގޮތުން މަޝްވަރާކޮށްފައިވެއެވެ.