ތ. ބުރުނީ ރައްޔިތުން ގާނޫނުތަކާއި ގަވާއިދުތަކަށް އަހުލުވެރިކުރުމަށް ހޭލުންތެރިކުރުވުމުގެ ހަރަކާތެއް ކުރިއަށް ގެންގޮސްފިއެވެ.
ބުރުނީ ޕޮލިސް ޕޯސްޓުން މި މަހު 3 ވަނަ ދުވަހު ކުރިއަށްގެންދިޔަ މި ހަރަކާތަކީ މަގުމަތީގައި ދިމާވާ ހިތާމަވެރި ހާދިސާތައް މަދުކުރުމަށާއި ކޮންމެ ރައްޔިތަކީ ވެސް މަގުމަތީގެ ސަލާމަތާއި ރައްކާތެރިކަމަށް ވިސްނައިގެން ޒިންމާދާރުކަމާއެކު މަގު ބޭނުންކުރާ ރައްޔިތަކަށް ހެދުމުގެ ގޮތުން ކުރިއަށްގެންދިޔަ ހަރަކާތެކެވެ.
މި ހަރަކާތުގައި އެއްގަމު އުޅަނދު ދުއްވުމުގައި، ގާނޫނާއި ގަވާއިދުތަކުގައި ބަޔާންކޮށްފައިވާ ކަންކަމަށް ވިސްނައިގެން އެއްގަމު އުޅަނދު ދުއްވުމަށާއި ތިމާއާއި އަނެކުންގެ ސަލާމަތަށް ސަމާލުކަންދީގެން އުޅަނދު ދުއްވުމަށް މައުލޫމާތު ދީފައިވެއެވެ. އަދި މަގުމަތީގައި ހިނގާ ހާދިސާތަކާއި ދިމާވާ އެހެނިހެން މައްސަލަތައް ހައްލުކުރުމުގައި ގުޅިގެން މަސައްކަތްކުރުމުގެ މުހިންމުކަމާ ގުޅޭގޮތުން ވެސް މައުލޫމާތު ހިއްސާކޮށްފައިވެއެވެ. އަދި އެއްގަމު އުޅަނދުގައި ފުރިހަމަކޮށްފައި ހުންނަންޖެހޭ ކަންކަން ފުރިހަމަކޮށްގެން އުޅަނދު ދުއްވުމަށް ނަސޭހަތްތެރިވެފައިވެއެވެ.
މީގެ އިތުރުން، އެއްގަމު އުޅަނދު ދުއްވާއިރު މުވާސަލާތީ ވަސީލަތް ބޭނުން ކުރަންޖެހޭ ގޮތާއި، އޯވަރ ސްޕީޑުގައި ދުއްވާނަމަ ނުކުމެދާނެ ނުރަނގަޅު ނަތީޖާތައް ބުނެދީފައިވެއެވެ. އަދި އުޅަނދު ޒޯންގައި ރަޖިސްޓްރީ ކޮށްގެން ދުއްވުމަށާއި ހަމަޖެހިފައިވާ ތަނުގައި އުޅަނދު ޕާކު ކުރާއިރު ފަރުވާތެރިވާންޖެހޭ ކަންކަން ބުނެދީފައިވެއެވެ.
މި ހަރަކާތް ކުރިއަށް ގެންދިޔުމުގައި ބުރުނީ ރައްޔިތުންގެ ފުރިހަމަ އެއްބާރުލުމެއް ލިބިފައިވެއެވެ.
