ގާނޫނީގޮތުން ބެލެނިވެރިންގެ ޒިންމާތަކާއި މަގުމަތީގެ ރައްކާތެރިކަމާ ގުޅޭގޮތުން ބެލެނިވެރިން ހޭލުންތެރިކުރުވުމަށް މައުލޫމާތު ދިނުމުގެ ސެޝަނެއް ރ. އަނގޮޅިތީމުގައި ކުރިއަށް ގެންގޮސްފިއެވެ.

ފެބުރުވަރީ 26 ވަނަ ދުވަހު މި ސެޝަން ކުރިއަށް ގެންގޮސްފައިވަނީ އަނގޮޅިތީމު ޕޮލިސް ޕޯސްޓުގެ ފުލުހުންނެވެ.

“ގާނޫނީގޮތުން ބެލެނިވެރިންގެ ޒިންމާތައް އަދި މަގުމަތީގެ ރައްކާތެރިކަން” މި ޝިއާރުގެ ދަށުން ކުރިއަށް ގެންދިޔަ މި ސެޝަނުގައި އަނގޮޅިތީމު ސުކޫލުގެ 40 އަށްވުރެ ގިނަ ބެލެނިވެރިން ބައިވެރިވިއެވެ. މި ސެޝަންގައި، ކުޑަކުދިންގެ ހައްގުތައް ރައްކާތެރިކުރުމުގެ ގާނޫނާއި، ކުޑަކުދިންގެ އަދުލުގެ ގާނޫނާއި އާންމު އާންމު އިޖުތިމާއީ މިންގަނޑުތަކާ ކިލާފު އަމަލުތައް ހުއްޓުވުމުގެ ގާނޫނުގެ އިތުރުން އެއްގަމު ދަތުރުފަތުރުގެ ގާނޫނާ ގުޅޭގޮތުން މައުލޫމާތު ދީފައިވެއެވެ.

މީގެ އިތުރުން، ދަރިން ތަރުބިއްޔަތު ކުރުމުގައި ދިމާވާ އެކި ކަހަލަ ގޮންޖެހުންތަކާއި މައްސަލަތަކާ ގުޅޭގޮތުން ބެލެނިވެރިންގެ ހުރި ކަންބޮޑުވުންތަކާ ބެހޭގޮތުން ސުވާލުކުރުމުގެ ފުރުސަތު ހުޅުވައިލުމުން ބެލެނިވެރިން ކުރި ސުވާލުތަކަށް ޖަވާބު ދީފައިވެއެވެ.

މިފަދަ ސެޝަންތަކަކީ މުޖުތަމައުގައި ކުށް މަދުކުރުމަށާއި، ދަރިން ބޮޑެތިވަމުން އަންނައިރު ގާނޫނާއި ގަވާއިދުތަކަށް ބޯލަނބާ ބަޔަކަށް ހެދުމަށް ބެލެނިވެރިންގެ ދައުރު ހަރުދަނާކުރުމުގެ މަގުސަދުގައި ކުރިއަށް ގެންދާ ހަރަކާތްތަކެކެވެ.