ދ. ހުޅުދެލީ ސުކޫލު މުދައްރިސުންނަށް ސައިބަރ އެވެއާނަސް ސެޝަނެއް ކުރިއަށް ގެންގޮސްފިއެވެ.
މި މާރިޗު މަހުގެ 3 ވަނަ ދުވަހު ހުޅުދެލީ ޕޮލިސް ޕޯސްޓުން ކުރިއަށް ގެންދިޔަ މި ސެޝަންގައި، އިންޓަނެޓް މެދުވެރިކޮށް ހިންގާ ކުށްތަކުން ރައްކާތެރިވެ ތިބުމަށް ކުރެވިދާނެ ކަންކަމާ ގުޅޭގޮތުން މައުލޫމާތު ދީފައިވެއެވެ. އަދި ރައްކާތެރިކަމާއެކު ސޯޝަލް މީޑިއާ ބޭނުންކުރާނެ ގޮތްތަކުގެ މައްޗަށް އަލިއަޅުވައި މައުލޫމާތު ހިއްސާކޮށްފައިވެއެވެ.
މީގެ އިތުރުން، ކޭޝްކާޑު އަދި އޯޓީޕީ ކޯޑު އެހެން ފަރާތްތަކަށް ހިއްސާ ނުކުރުމާއި، ޓޫ-ފެކްޓަރ އޮތަންޓިކޭޝަން ހަދާނެގޮތާއި އެކަމުގެ މުހިންމުކަން މި ސެޝަންގެ ތެރެއިން ކިޔައިދީފައިވެއެވެ. އަދި މަކަރާއި ހީލަތުން ފައިސާ ހޯދުމުގެ މައްސަލަތަކުން ރައްކާތެރިވާނެ ގޮތްތަކުގެ މައުލޫމާތު ވެސް ހިއްސާކޮށްފައިވެއެވެ. މި ސެޝަންގައި އެ ސުކޫލުގެ 29 މުދައްރިސުން ބައިވެރިވިއެވެ.
ސުކޫލުތަކުގެ މުދައްރިސުންނާއި މުވައްޒަފުން ކުށުން ރައްކާތެރިކޮށް ހޭލުންތެރިކުރުވުމަށް މައުލޫމާތު ދިނުމުގެ މިފަދަ ސެޝަންތައް ސިލްސިލާކޮށް ފުލުހުން ދަނީ ހިންގަމުންނެވެ. މިފަދަ ސެޝަންތަކުގެ ސަބަބުން، ކުށުން ރައްކާތެރިވުމަށް އަޅަންވީ ފިޔަވަޅުތައް ދުރާލައި އެނިގެންދާނެއެވެ.
