ތ. ކަނޑޫދޫ ސުކޫލު މުދައްރިސުންނަށް މައުލޫމާތު ދިނުމުގެ ސެޝަނެއް ކުރިއަށް ގެންގޮސްފިއެވެ. މި ސެޝަންއަކީ އެ ސުކޫލު މުދައްރިސުންގެ ޕްރޮފެޝަނަލް ޑިވެލޮޕްމަންޓް ހަރަކާތުގެ ތެރެއިން ކުރިއަށް ގެންދިޔަ ސެޝަންއެވެ.

މާރިޗު 3 ވަނަ ދުވަހު ކަނޑޫދޫ ޕޮލިހާއި ސުކޫލު ގުޅިގެން ކުރިއަށް ގެންދިޔަ މި ސެޝަންގައި މައުލޫމާތު ދީފައިވަނީ ‘ވޯކް އެތިކްސް އިން ޕްރޮފެޝަން’ ތީމުގެ ދަށުންނެވެ. މި ސެޝަންގައި ކަނޑޫދޫ ސުކޫލުު މުދައްރިސުންގެ އިތުރުން އިދާރީ މުވައްޒަފުން ވެސް ބައިވެރިވިއެވެ.

މި ސެޝަންގައި، ވޯކް އެތިކްސްއަކީ ކޮބައިކަމާއި، ވޯކް އެތިކްސްގެ މުހިންމުކަމާއި، ސިފަތަކުގެ އިތުރުން، ރަނގަޅު އަދި ނުރަނގަޅު އަހުލާގީ މިންގަނޑުތަކާ ގުޅޭގޮތުން މައުލޫމާތު ދީފައިވެއެވެ. އަދި ކަންކަމުގައި ގޮތް ނިންމުމާއި ރަނގަޅުގޮތުގައި މުއާމަލާތުކުރުމާއި އެ ހުނަރުތައް ތަރައްގީކުރާނެ ގޮތްތަކާއި، މަސައްކަތުގެ އަހުލާގު އިތުރަށް ހަރުދަނާކުރުމަށް ކުރެވޭނެ ކަންކަމާ ގުޅޭގޮތުން މައުލޫމާތު ދީފައިވެއެވެ. އޭގެ އިތުރުން، މަސައްކަތުގެ މާހައުލުގައި ޒިންމާދާރުވުމާއި ދޭދޭ ގުޅުންތައް ހަރުދަނާކުރުމާއި ދިމާވާ އެކި ކަންކަމުގައި ޓީމެއްގެ ގޮތުގައި ގުޅިގެން މަސައްކަތްކުރުމުގެ މައްޗަށް އަލިއަޅުވައި މައުލޫމާތު ދީފައިވެއެވެ.