އިސްކަންދަރު ސުކޫލު ސްޓެމް ކުލަބު ދަރިވަރުންނަށް ފޮރެންސިކް ސެޝަނެއް ކުރިއަށް ގެންގޮސްފިއެވެ. މި ސެޝަންގައި އެ ކުލަބުގެ 22 ދަރިވަރުންނާއި އެ ދަރިވަރުންގެ މުދައްރިސުން ބައިވެރިވިއެވެ.

މިއަދު ކުރިއަށް ގެންދިޔަ މި ސެޝަންގައި ފޮރެންސިކް ލެބޯޓްރީން ކުރާ މަސައްކަތްތަކާއި އެ މަސައްކަތުގައި ބޭނުންކުރާ ތަކެއްޗާ ގުޅޭގޮތުން މައުލޫމާތު ދީފައިވެއެވެ. އަދި ޕްރިންޓަކީ ކޮބައިކަމާއި ހާއްސަކޮށް ފިންގަރ ޕްރިންޓާއި، ފިންގަރ ޕްރިންޓްގެ ބޭނުންތަކާ ގުޅޭގޮތުން މައުލޫމާތު ދީފައިވެއެވެ.

އޭގެ އިތުރުން ވެސް ދަރިވަރުންގެ ކިޔެވުމަށް ބޭނުންވާނޭ އެހެނިހެން މައުލޫމާތު ހިއްސާކޮށް އަދި ދަރިވަރުންގެ ސުވާލުތަކަށް ޖަވާބުދީފައިވެއެވެ. މި ސެޝަނަކީ އެ ދަރިވަރުން ވަރަށް ޝައުގުވެރިވި ސެޝަނެކެވެ. މިފަދަ ސެޝަންތަކުގެ ސަބަބުން، ސުކޫލު މާހައުލުން ބޭރުން ދަރިވަރުންގެ ކިޔެވުމަށް ބޭނުންވާނޭ މައުލޫމާތު ލިބި އަމަލީ މައިދާނުގައި ކުރާ މަސައްކަތްތައް ދަރިވަރުންނަށް ދަސްވެގެންދާނެއެވެ.