ކޮންމެ އަހަރެއްގެ ވެސް އެޕްރީލް މަހުގެ 25 ވަނަ ދުވަހަކީ ބައިނަލް އަގުވާމީގޮތުން ފާހަގަކުރާ “ދުނިޔޭގެ ޑީ.އެން.އޭ” ދުވަހެވެ. ދުނިޔޭގެ ފެންވަރުގައި ޑީ.އެން.އޭ ދުވަސް ފާހަގަކުރަމުން އަންނަތާ 23 އަހަރު ފުރުނީއެވެ.

މި ދުވަހަކީ ސައިންސްގެ ދާއިރާއިން ހޯދުނު އެންމެ މުހިންމު އެއް ކާމިޔާބީ ކަމުގައިވާ ޑީ.އެން.އޭގެ 'ޑަބަލް ހީލިކްސް' އޮނިގަނޑު ހޯދުމާއި، 'ހިއުމަން ޖީނޯމް ޕްރޮޖެކްޓް' ފުރިހަމަކުރުން ފާހަގަކުރާ ދުވަހެވެ. މިއީ ޖެނެޓިކް ސައިންސްގެ ދާއިރާއިން ސައިންސްވެރިން ހޯދާފައިވާ ކުރިއެރުންތަކާއި، އެކަމުގެ ސަބަބުން އަޅުގަނޑުމެންގެ ދިރިއުޅުމަށް އަންނަމުންދާ ބަދަލުތައް ވަޒަންކޮށްލުމަށް ލިބޭ ފުރުސަތެކެވެ.
 

ފޮރެންސިކް ސައިންސްގެ ދާއިރާގައި އިންސާނުން ދެނެގަތުމާއި، ހަގީގަތަށް ވާސިލުވުމަށާއި އިންސާފު ގާއިމުކުރުމަށްޓަކައި ޑީ.އެން.އޭ އަދާކުރަނީ ވަރަށް މުހިންމު ދައުރެކެވެ. މިޒަމާނުގެ ކުރިއަރާފައިވާ ޑީ.އެން.އޭ ތަހުލީލުތަކުގެ އެހީގައި، ފޮރެންސިކް ލެބޯޓަރީތަކަށް  ޔަގީންކަމާއެކު މީހުން ދެނެގަނެވެއެވެ. މީގެ ސަބަބުން ކުށްކުރާ މީހުން ދެނެގަތުމަށާއި، ކުށެއް ނެތް މީހުން ކުށުން ބަރީއަކުރުމުގެ އިތުރުން، އެކި ކާރިސާތަކުގައި ނިޔާވާ މީހުން ދެނެގަނެވެއެވެ.
 

ދިވެހި ފުލުހުންގެ ޚިދުމަތުގެ ފޮރެންސިކް ސަރވިސަސްގެ ޑީ.އެން.އޭ ލެބޯޓަރީގެ މައިގަނޑު މަސައްކަތުގެ ތެރޭގައި، ކުށްކުރާ މީހުން ދެނެގަނެ ގާނޫނު ތަންފީޒުކުރާ އިދާރާތަކަށާއި، އަދުލު އިންސާފުގެ ނިޒާމަށް ބޭނުންވާ މާއްދީ ހެއްކާ ގުޅޭ އިތުބާރު ހުރި ނަތީޖާތައް ފޯރުކޮށްދިނުން ހިމެނެއެވެ. ލެބޯޓަރީގެ މަސައްކަތްތަކާއި ތަހުލީލުގެ ނިންމުންތައް ބިނާކުރެވެނީ ސައިންޓިފިކް ކޮމިއުނިޓީން ބަލައިގެންފައިވާ މިންގަނޑުތަކާ އެއްގޮތްވާގޮތުގެ މަތިންނެވެ. ދުނިޔޭގެ ޑީ.އެން.އޭ ދުވަހަކީ ހަމައެކަނި ސައިންޓިފިކް ކުރިއެރުންތަށް ފާހަގަކުރާ ދުވަހެއް ނޫނެވެ. މިއީ ޓެކްނޮލޮޖީ ކުރިއަރަމުންދާ ވަރަކަށް، ޑީ.އެން.އޭ ސައިންސްގެ ބޭނުން އަހުލާގީ މިންގަނޑުތަކުގެ ތެރެއިން، ޒިންމާދާރުކަމާއެކު މުޖުތަމައުގެ ލާބައާއި މަންފާއަށްޓަކައި ފޯރުކޮށްދިނުމަށް މި ފަންނުގެ ބޭފުޅުން އަޒުމުއާކުރާ ދުވަހެވެ.
 

މި ފަންނު ތަރައްގީކުރުމަށް ކުރެވޭ ދިރާސާތަކާއި، އައު އީޖާދުތަކާ އަދި ގުޅިގެން ކުރެވޭ މަސައްކަތްތަކުގެ އެހީގައި، ޑީ.އެން.އޭ ސައިންސް ވެގެންދާނީ ޒަމާނީ ފޮރެންސިކްގެ މައިބަދަ އަށެވެ. މިއީ އެންމެހައި ފަރާތްތަކަށް އަމާން އަދި އިންސާފުވެރި ދުނިޔެއެއް ބިނާކުރުމަށް އެހީތެރިވެދޭނެ މުހިންމު ވަސީލަތެކެވެ. މިއީ ދިވެހި ފުލުހުންގެ ޑީ.އެން.އޭ ލެބޯޓަރީގައި ގާއިމުކުރެވިފައިވާ ޒަމާނީ ވަސީލަތްތަކުގެ ފުރިހަމަ ބޭނުން އެންމެ އެދެވޭ ގޮތުގައި ހިފަންވީ ވަގުތެވެ. މި ދުވަހުގެ ތަހުނިޔާ ދިވެހި ފުލުހުންގެ ޚިދުމަތުގެ ޑީ.އެން.އޭ އެނަލިސްޓުންނަށާއި، ފޮރެންސިކް ސަރވިސަސްގެ މުވައްޒަފުންނަށާއި ޑީ.އެން.އޭ ތަހުލީލުތަކުގެ ހިދުމަތް ލިބިގަންނަ ބަހާތަކަށް ފޮނުވަމެވެ.