ސައިބަރ ކްރައިމްގެ މައްސަލަތަކުން ރައްކާތެރިކުރުވުމަށް ކ. ހިންމަފުށީ ސުކޫލު ދަރިވަރުންނާއި މުދައްރިސުންނާއި ބެލެނިވެރިންނަށް މައުލޫމާތު ދީފިއެވެ.
މެއި 12 ވަނަ ދުވަހު މި ސެޝަންތައް ކުރިއަށް ގެންގޮސްފައި ވަނީ ހިންމަފުށީ ޕޮލިސް ސްޓޭޝަނާއި، ސުކޫލާއި، ޕަބްލިކް ޓްރަސްޓް އެންޑް ކޮންފިޑެންސް މެނޭޖްމަންޓާއި، ސައިބަރ ކްރައިމް ސެންޓަރު ގުޅިގެންނެވެ.
މި ސެޝަންތަކުގެ ތެރެއިން، ހިންމަފުށީ ސުކޫލު ގުރޭޑު 6 އަދި 7 ގެ ދަރިވަރުންނަށް ކުރިއަށް ގެންދިޔަ ސެޝަނަކީ އެ ދަރިވަރުންގެ ޑިޖިޓަލް އެވެއާނެސް އިތުރުކުރުމާއި ސައިބަރ ކްރައިމްއިން ރައްކާތެރިވުމަށް ހޭލުންތެރިކުރުވުމަށް ކުރިއަށް ގެންދިޔަ ސެޝަނެކެވެ. ދެ ގުރޭޑު ހިމެނޭގޮތަށް 69 ދަރިވަރުން ބައިވެރިވި އެ ސެޝަނުގައި، އިންޓަނެޓްގެ މުހިންމުކަމާއި އިންޓަނެޓް ބޭނުންކުރުމުގެ ރައްކާތެރި ގޮތްތަކާ އަދި ފޯނާއި ކޮމްޕިއުޓަރު ފަދަ ތަކެތީގައި ހުންނަ ޒާތީ މައުލޫމާތު ވަގަށްނަގާ މައްސަލަތަކާއި އެކަމުގެ ސަބަބުން އެނގެން ނުޖެހޭ ގިނަ މައުލޫމާތު، ކުށްކުރާ ފަރާތްތަކަށް އެނގި، ސައިބަރ ކްރައިމްގެ ބޮޑެތި މައްސަލަތައް ހުށަހެޅެމުންދާތީ އެ ކަންކަމުން ސަލާމަތްވެތިބުމަށް މައުލޫމަތު ދީފައިވެއެވެ. އަދި އެފަދަ ނޭދެވޭ ހުރިހާ ކަމަކުން ރައްކާތެރިވުމަށް ނަސޭހަތްތެރިވެފައިވެއެވެ.
ބެލެނިވެރިންނާއި މުދައްރިސުންގެ ސެޝަން ކުރިއަށް ގެންގޮސްފައި ވަނީ "މިއަދުގެ ހޭލުންތެރި ބެލެނިވެރިޔާ – މާދަމާގެ މުސްތަގުބަލް" މައުލޫގެ ދަށުންނެވެ. މި ސެޝަނުގައި، ހެޔޮގޮތުގައި ދަރިން ތަރުބިއްޔަތުކުރުމަށް ބޭނުން ކުރެވިދާނެ ހުނަރުތަކާއި ބެލެނިވެރިންނާއި މައިންބަފައިން ދަރިން ތަރުބިއްޔަތުކުރުމުގައި ވިސްނުން ގެންގުޅެންޖެހޭ އަދި ސަމާލުވާންޖެހޭ ކަންކަމުގެ މައްޗަށް އަލިއަޅުވައި މައުލޫމާތު ދީފައިވެއެވެ. ހަމަ އެހެންމެ، އެއްވެސް ކޮންޓްރޯލެއް ނުވަތަ މޮނިޓަރިންގއެއް ނެތި ފޯނާއި ޓެބްލެޓް ފަދަ ވަސީލަތްތައް ފޯރުކޮށްދިނުމުގެ ސަބަބުން އެ ކުދިން ސައިބަރ އަދި ބްލެކްމެއިލްގެ ޝިކާރައަކަށްވާ މައްސަލަތައް މަދުކޮށް ސަލާމަތްވާނެ ގޮތްތައް ކިޔައިދީފައިވެއެވެ.
އޭގެ އިތުރުން، ކުދިންނަށް މޯބައިލް ފޯނާއި ޓެބްލެޓް ފަދަ ސްމާޓް ޑިޖިޓަލް ވަސީލަތްތައް ދޭއިރު އެކުދިން އެފަދަ ތަކެތި ބޭނުންކުރަނީ އެންމެ ރަނގަޅު ގޮތުގައިތޯ ބަލައި ޗެކުކުރުމަށާއި، އެކުދިން ގޯސް މަގަކުން ދިއުމުގެކުރިން ކުދިން ރަނގަޅުކޮށް ރަނގަޅު މުޖުތަމައެއް ބިނާކުރުމުގެ އެންމެ މުހިންމު ދައުރެއް އަދާކުރާ ފަރާތްތަކަކީ މުދަރިއްސުނާއި ބެލެނިވެރިންކަން ހަނދާންކޮށްދީފައިވެއެވެ.
