ގަނާކުރުމުން ދުރުހެލިކުރުވުމަށް ފ. އަތޮޅު މަދަރުސާއާއި ދަރަނބޫދޫ ސުކޫލު ގުރޭޑު 7 އިން ފެށިގެން މަތީގެ ދަރިވަރުންނަށް މައުލޫމާތު ދިނުމުގެ ސެޝަނެއް ކުރިއަށް ގެންގޮސްފިއެވެ. މި ސެޝަންތަކަކީ ކުށްމަދު އަމާން މުޖުތަމައެއް ބިނާކޮށް، މުޖުތަމައުގައި ހިނގާ ނޭދެވޭ ކަންތައްތަކުން ސުކޫލު ދަރިވަރުން ދުރުހެލިކުރުވައި ހޭލުންތެރިކުރުވުމަށް ފުލުހުން ކުރަމުންދާ މަސައްކަތްތަކުގެ ތެރެއިން ކުރިއަށް ގެންދިޔަ ސެޝަންތަކެކެވެ.
މި ސެޝަންތަކުގެ ތެރެއިން ފީއަލީ ޕޮލިސް ޕޯސްޓާއި ފ. އަތޮޅު މަދަރުސާ ގުޅިގެން އެ މަދަރުސާގެ ދަރިވަރުންނަށް ސެޝަން ކުރިއަށް ގެންގޮސްފައި ވަނީ މެއި 19 ވަނަ ދުވަހުއެވެ. ދަރަނބޫދޫ ޕޮލިސް ޕޯސްޓާއި ދަރަނބޫދޫ ސުކޫލު ގުޅިގެން އެ ސުކޫލު ދަރިވަރުންގެ ސެޝަން ކުރިއަށް ގެންގޮސްފައި ވަނީ މެއި 20 ވަނަ ދުވަހުއެވެ.
މި ސެޝަންތަކުގައި، ގަނާކުރުމަކީ ކޮބައިކަމާއި، ގަނާ މާނަކުރެވިފައިވާ ގޮތްތަކާއި، ގަނާ ކުރުމުން ދުރުހެލިވެ ރައްކާތެރިވާނެ ގޮތްތަކާ ގުޅޭގޮތުން މައުލޫމާތު ދީފައިވެއެވެ. އަދި އެހެން ކުދިން އެކަމުން ރައްކާތެރިކުރުމަށް މަސައްކަތްކުރާނެ ގޮތްތައް ކިޔައިދީފައިވެއެވެ. އަދި ގަނާކުރުމުގެ ސަބަބުން ނުކުންނަ ނުރަނގަޅު ނަތީޖާއާއި ގަނާގެ ޝިކާރައަށްވާ ކުއްޖާއަށް އެކަމުގެ ސަބަބުން ކުރިމަތިވާ ގެއްލުންތަކާއި ދިމާވާ ހިތާމަވެރި ހާދިސާތަކުން ތިމާއާއި އާއިލާ ސަލާމަތްކުރާނެ ގޮތްތައް ބުނެދީފައިވެއެވެ. އަދި މިކަން ހުއްޓުވުމަށް ދަރިވަރުންނަށް ކުރެވިދާނެ ކަންކަމާ ގުޅޭގޮތުން ވެސް މައުލޫމާތު ދީފައިވެއެވެ.
މި ސެޝަންގެ ތެރެއިން ދަރިވަރުންގެ ހިޔާލު ހޯދައި މަޝްވަރާކޮށް ދަރިވަރުންގެ ހިޔާލުތައް ހުށަހަޅައިދީފައި ވެއެވެ. އެގޮތުން ގަނާ އަދި ފުރައްސާރަކޮށް ޖެއްސުންކުރާނަމަ އަމަލުކުރާނެގޮތާއި، ގަނާ ރައްދުވާ ކުއްޖާއަށް ކުރެވޭނެ އިހުސާސްތަކާއި، ގަނާކުރުން ހުއްޓުވުމަށް ދަރިވަރުންނަށް ކުރެވޭނެ ކަންތައްތަކާ ގުޅޭގޮތުން މަޝްވަރާކޮށްފައިވެއެވެ. މި ސެޝަންގައި ފ. އަތޮޅު މަދަރުސާއިން 66 ދަރިވަރުން ބައިވެރިވިއެވެ. އަދި ދަރަނބޫދޫ ސުކޫލުގެ 32 ދަރިވަރުން ބައިވެރިވިއެވެ.
