ހުޅުމާލޭ ޣާޒީ ސުކޫލާއި، ރެހެންދި ސުކޫލާއި، ހުރަވީ ސުކޫލު ދަރިވަރުންނަށް ކުރިއަށް ގެންދިޔަ ޓްރެފިކް މޮނީޓާސް ޕްރޮގްރާމް ނިންމުމުގެ ރަސްމިއްޔާތު ބާއްވައިފިއެވެ.

މިި ޕްރޮގްރާމް ނިންމުމަށް، މެއި 20 ވަނަ ދުވަހުގެ ރޭ ރެހެންދި ސުކޫލުގައި ބޭއްވި ރަސްމިޔާތު ޝަރަފުވެރިކޮށްދެއްވީ ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުގެ އެގްޒެކެޓިވް ޑިރެކްޓަރ  އެސިސްޓެންޓް ކޮމިޝަނަރ އޮފް ޕޮލިސް އަޙްމަދު ޢަބްދުއްރަޙްމާންއެވެ. މި ރަސްމިއްޔާތުގައި، މާލެ ސިޓީ ޕޮލިސް ޑެޕިއުޓީ ހެޑް، ޗީފް ސުޕްރިންޓެންޑެންޓް އޮފް ޕޮލިސް އަޙްމަދު އަޒްހާނާއި، ޓްރެފިކް ޕޮލިސް އެންޑް ރޯޑް މެނޭޖްމަންޓް ހެޑް، ސުޕްރިންޓެންޑެންޓް އޮފް ޕޮލިސް މުޖުތަބާ ޢަބްދުއްސައްތާރާއި، އެ ތިން ސުކޫލުގެ ޕްރިންސިޕަލުންނާއި ފުލުހުންގެ ޚިދުމަތުގެ ބައެއް އޮފިސަރުންގެ އިތުރުން ސުކޫލުތަކުގެ އިސްވެރިން ބައިވެރިވެލެއްވިއެވެ.

މި ރަސްމިއްޔާތުގައި، ޓްރެފިކް މޮނީޓާސް ޕްރޮގްރާމް ފުރިހަމަކުރި 107 ދަރިވަރުންނަށް ސެޓްފިކެޓް ދީފައިވެއެވެ. އޭގެތެރޭގައި ހިމެނެނީ، ޣާޒީ ސުކޫލުގެ 40 ދަރިވަރުންނާއި ހުރަވީ ސުކޫލުގެ 32 ދަރިވަރުންގެ އިތުރުން ރެހެންދި ސުކޫލުގެ 35 ދަރިވަރުންނެވެ. މި ދަރިވަރުންނަށް ޓްރެފިކް މޮނީޓާސް ޕްރޮގްރާމް ކުރިއަށް ގެންގޮސްފައި ވަނީ މި މެއި މަހުގެ 16 އިން 20 ވަނަ ދުވަހުގެ ނިޔަލަށެވެ.

މި ޕްރޮގްރާމްގެ ތެރެއިން މައުލޫމާތު ދިނުމުގެ ކުލާސްތަކާއި އަމަލީ ތަމްރީނުތައް ކުރިއަށް ގެންގޮސްފައިވެއެވެ. އެގޮތުން، އެއްގަމު ދަތުރުފަތުރުގެ ގާނޫނާއި ގަވާއިތަކުގެ މައުލޫމާތާއި، ސުކޫލު ސަރަހައްދުގައި ޓްރެފިކް މޮނީޓަރުންގެ ގޮތުގައި ހަރަކާތްތެރިވާނެ ގޮތްތަކާއި ދިމާވާ މައްސަލަތައް ހައްލުކުރާނެގޮތްތައް ދަސްކޮށްދީފައިވެއެވެ. އަދި މުއާމަލާތުކުރުމުގެ ހުނަރުތައް ވެސް ދަސްކޮށްދީފައިވެއެވެ.

އޭގެ އިތުރުން، ދިމާވެދާނެ ކުއްލި ހާލަތްތަކަށް ދުރާލާ ދަރިވަރުން ތައްޔާރުކުރުމުގެ ގޮތުން، އެފަދަ ހާލަތްތަކުގައި އަމަލުކުރާނެ ގޮތްތައް ދަސްކޮށްދިނުމަށް ސެލްފްޑިފެންސް ކުލާސްތައް ވެސް ކުރިއަށް ގެންގޮސްފައިވެއެވެ.