“އިންޓަނޭޝަނަލް ރޯޑް ސޭފްޓީ ޑޭ” ފާހަގަކުރުމަށް ސުކޫލުތަކުގެ ދަރިވަރުންނަށް މައުލޫމާތު ދިނުމުގެ ހަރަކާތެއް ކުރިއަށް ގެންގޮސްފިއެވެ.

މެއި 17 ވަނަ ދުވަހު މި ހަރަކާތް ކުރިއަށް ގެންގޮސްފައި ވަނީ ޓްރެފިކް ޕޮލިސް އެންޑް ރޯޑް މެނޭޖްމަންޓުން އިންތިޒާމުކޮށްގެން ރަށްރަށުގެ ޕޮލިސް ސްޓޭޝަންތަކާ ގުޅިގެންނެވެ. މި ހަރަކާތުގައި، ފުލުހުން ސުކޫލުތަކަށް ޒިޔާރަތްކޮށް އެ ސުކޫލުތަކުގެ އެސެމްބުލީގައި ބައިވެރިވެ މަގުމަތީގެ ސަލާމަތާއި ރައްކާތެރިިކަން ކަށަވަރުކުރުމަށް ދަރިވަރުން އަހުލުވެރިކުރުވުމަށް މައުލޫމާތު ދީފައިވެއެވެ.

އެގޮތުން، މަގުމަތީގައި ހިނގާ ހާދިސާތަކާއި އެކްސިޑެންޓުތަކުން ރައްކާތެރިވުމަށް ދަރިވަރުންނަށް ކުރެވިދާނެ ކަންތައްތަކާ ގުޅޭގޮތުން މައުލޫމާތު ދީފައިވެއެވެ. އަދި މަގުމަތީގައި އުޅޭއިރު ދަރިވަރުން ހާއްސަ ސަމާލުކަމެއް ދޭންޖެހޭ ކަންތައްތަކާއި އެއްގަމު އުޅަނދުގައި ދަތުރުކުރާއިރު ދަރިވަރުންގެ ހައިސިއްޔަތުން ސަމާލުކަންދޭންޖެހޭ ކަންކަން ކިޔައިދީފައިވެއެވެ.

އޭގެ އިތުރުން ވެސް މަގުމަތީގެ ރިވެތި އަދަބުތަކާއި، މަގުމަތީގެ ގަވާއިދުތަކަށް ފުރިހަމައަށް ބޯލެނބުމަށާއި ދަރިވަރުންގެ ސަލާމަތާއި ރައްކާތެރިކަން ކަށަވަރުކުރުމަށް އެކި މައުލޫމާތު ހިއްސާކޮށްފައިވެއެވެ.

މި ޕްރޮގްރާމް ކުރިއަށް ގެންގޮސްފައި ވަނީ މާލެއިން ތާޖުއްދީން ސުކޫލާއި، ހިރިޔާ ސުކޫލާއި، ޖަމާލުއްދީން ސުކޫލާއި، އަމީނިއްޔާ ސުކޫލާއި، އިސްކަންދަރު ސުކޫލާއި، އިމާދުއްދީން ސުކޫލާއި، ދަރުމަވަންތަ ސުކޫލާއި، ސީ.އެޗް.އެސް.ސީއާއި، ކަލާފާނު ސުކޫލާއި، އަރަބިއްޔާ ސުކޫލުގެ އިތުރުން މަޖީދިއްޔާ ސުކޫލުގައެވެ. އަދި ހުޅުމާލެއިން، ހުރަވީ ސުކޫލާއި، ޣާޒީ ސުކޫލާއި، ރެހެންދި ސުކޫލާއި، ޞަލާހުއްދީން ސުކޫލުގެ އިތުރުން ޝަހީދު އަލީ ސުކޫލުގައެވެ. އޭގެ އިތުރުން، އަތޮޅުތެރެއިން ކުޅުދުއްފުށި ސިޓީގެ 3 ސުކޫލާއި ލ. އަތޮޅުގެ 3 ސުކޫލާއި ތިނަދޫ ސިޓީގެ 3 ސުކޫލުގެ އިތުރުން ފުވައްމުލައް ސިޓީގެ 4 ސުކޫލާއި އައްޑޫސިޓީގެ 7 ސުކޫލުގައެވެ.