ރައްޔިތުން ހޭލުންތެރިކުރުވުމަށް މައުލޫމާތު ދިނުމުގެ ހަރަކާތެއް މަރަދޫ، މަރަދޫފޭދޫ އަދި ފޭދޫގައި ކުރިއަށް ގެންގޮސްފިއެވެ.

މެއި 26 ވަނަ ދުވަހު ގަން ޕޮލިސް ސްޓޭޝަނުން ކުރިއަށް ގެންދިޔަ މި ހަރަކާތަކީ އީދު ބަންދުގައި ރަށްރަށަށް ގިނަ ބަޔަކު ޒިޔާރަތްކޮށް އަދި އީދުކުޅިވަރުގައި ގިނަ ވަގުތުތަކެއް ހޭދަކުރާއިރު، ހިނގާފާނެ ކުށްތަކުން އާންމު ރައްޔިތުން ރައްކާތެރިކުރުވުމަށް ހޭލުންތެރިކުރުވުމަށް ކުރިއަށް ގެންދިޔަ ހަރަކާތެކެވެ.

މި ހަރަކާތުގައި ރަށުގެ އެކި ސަރަހައްދުތަކުން އާންމު ރައްޔިތުންނާ ބައްދަލުކޮށް މައުލޫމާތުދީ އަދި ހޭލުންތެރިކުރުމުގެ މައުލޫމާތު ހިމެނޭ ލީފްލެޓް ބަހާފައިވެއެވެ. އެގޮތުން، އީދު ބަންދުގައި ރަށުން ބޭރަށް ފުރައިގެންދާއިރު ނުވަތަ ގެއިން ބޭރަށްދާއިރު ގޯތިގެދޮރާއި މުދާ ރައްކާތެރިކޮށް ބެހެއްޓުމަށް ކުރެވިދާނެ ކަންކަމުގެ މައުލޫމާތު ދިނުމާއި، ހާއްސަކޮށް ވައްކަންކުރާ މީހުންގެ ފަރާތުން ގެދޮރާއި މުދާ ސަލާމަތްކުރުމަށް ކުރެވިދާނެ ކަންކަމުގެ މައުލޫމާތު ހިއްސާކޮށްފައިވެއެވެ.

އޭގެ އިތުރުން، ގޭގެ ދޮރުތަކާއި ފެންލައިޓްތައް ތަޅުލެވިފައި ހުރިތޯ ޔަގީންކުރުމަށާއި، ގެ ހުސްކޮށްފައި ފުރައިގެންދާނަމަ އިތުބާރުކުރެވޭ ގާތް މީހުންނާ ގެ ހަވާލުކުރުމަށާއި، އަގުބޮޑެތި ތަކެތި ގޭގައި ނުބެހެއްޓުމަށާއި އީދު ކުޅިވަރު ބެލުމަށާއި ކުޅިވަރުތަކުގައި ބައިވެރިވުމަށް ގޮސް އުޅޭއިރު ވެސް އަމިއްލަ ތަކެއްޗަށް ރައްކާތެރިވުމަށް ނަސޭހަތްތެރިވެފައިވެއެވެ.