ދިވެހި ފުލުހުންގެ ޚިދުމަތުގައި އިހުލާސްތެރި މަސައްކަތްތަކެއް ކުރައްވަމުން ގެންދެވި ސަބް އިންސްޕެކްޓަރ އޮފް ޕޮލިސް އަޙްމަދު ޢާސިފް (ސ.ނ. 4702، ވާދީ / ހއ. އުލިގަން) މިއަދުގެ ވަގުތެއްގައި ވަނީ ނިޔާވެފައެވެ.
ފުން ހިތާމައިގެ މި ދަނޑިވަޅުގައި، ކޮމިޝަނަރ އޮފް ޕޮލިސް އަޙްމަދު މުޙައްމަދާއި، ފުލުހުންގެ މުއައްސަސާގެ އެންމެހައި މުވައްޒަފުންގެ ނަމުގައި މަރުޙޫމްގެ އާއިލާއަށް ތަޢުޒިޔާ ދަންނަވަމެވެ. މާތް ﷲ މަރުޙޫމްގެ ފުރާނައަށް ރަހުމަތްލައްވައި، ސުވަރުގޭގެ ދާއިމީ ނިޢުމަތް މިންވަރުކުރައްވާށިއެވެ. އަދި ބަރުޒަޚުގެ ޢާލަމް ތަނަވަސްކޮށްދެއްވައި، ފާފަ ފުއްސަވައިދެއްވުން އެދި އެކަލާނގެ ޙަޟްރަތުގައި ދުޢާ ދަންނަވަމެވެ. އާމީން.
ސަބް އިންސްޕެކްޓަރ އޮފް ޕޮލިސް އަޙްމަދު ޢާސިފް، 20 މާރިޗު 2012 އިން ފެށިގެން، 14 އަހަރާއި 2 މަހަށްވުރެ ދިގު މުއްދަތަކަށް ދިވެހި ފުލުހުންގެ ޚިދުމަތަށް ޚިދުމަތް ކުރައްވާފައިވެއެވެ. އޭނާ ވަނީ ފުލުހުންގެ ޚިދުމަތުގެ އެކި ދާއިރާތަކުގައާއި، މުހިއްމު އޮޕަރޭޝަންތަކެއްގައި އަމަލީ ގޮތުން ބައިވެރިވެ، މުހިއްމު މަސައްކަތްތަކެއް ކުރައްވާފައެވެ. ނިޔާވިއިރު އޭނާ މަސައްކަތްކުރައްވަމުން ގެންދެވީ ޑްރަގް އެންފޯސްމަންޓް / ކައުންޓަރ ނާކޮޓިކްސް އޮޕަރޭޝަންސްގެ އޮޕަރޭޝަންސް ޓީމް ލީޑަރެއްގެ މަގާމުގައެވެ.
26 އޮގަސްޓް 1992 ގައި އުފަންވި އަޙްމަދު ޢާސިފް ނިޔާވިއިރު އުމުރަކީ 33 އަހަރެވެ. ނިޔާވި އިރު އަނބިކަނބަލަކާއި ފިރިހެން ދެ ބޭފުޅަކު ދުނިޔޭގައި އެބަތިއްބެވިއެވެ.
