ނ. ހޮޅުދޫ މޭނާ ސުކޫލު ގުރޭޑު 11 އަށް އަލަށް ގުޅުނު ދަރިވަރުންނަށް މައުލޫމާތު ދިނުމުގެ ސެޝަންތަކެއް ކުރިއަށް ގެންގޮސްފިއެވެ.

މި މަހު 7 އިން 1 1 އަށް އެ ސުކޫލުގައި ކުރިއަށްގެންދިޔަ މި ސެޝަންތަކަކީ ސުކޫލު ދަރިވަރުންގެ ހޭލުންތެރިކަން އިތުރުކުރުމަށާއި ކޮންމެ ދަރިވަރަކީ ވެސް ފަރުދީގޮތުން ޒިންމާދާރު ދަރިވަރަކަށް ހެދުމަށާއި ސުކޫލު ނިންމައި މުޖުތަމައަށް ނުކުންނަ ދަރިވަރުން މަސައްކަތްތަކަށް އަހުލުވެރިކޮށް ކުށްމަދު އަމާން މުޖުތަމައެއް ބިނާކުރުމަށް ފުލުހުން ކުރަމުންގެންދާ މަސައްކަތްތަކުގެ ތެރެއިން ކުރިއަށްގެންދިޔަ ސެޝަންތަކެކެވެ.

މި ސެޝަންތަކުގައި މައުލޫމާތު ހިއްސާކޮށްފައި ވަނީ ކެރިއަރ ގައިޑެންސްއާއި ސައިބަރ ބުލީންގ އަދި އިންޓަނެޓް ސެކިއުރިޓީ އާ ގުޅޭގޮތުންނެވެ. އެގޮތުން، ކެރިއަރ ގައިޑެންސްއާ ގުޅޭގޮތުން ކުރިއަށް ގެންދިޔަ ސެޝަނުގައި، ފުލުހުންގެ ދައުރަކީ ކޮބައިކަމާއި ފުލުހުންގެ މަސައްކަތްތައް ތަރުތީބުކުރެވިފައިވާ ގޮތާއި ފުލުހުންގެ މުއައްސަސާގައި ހުރި ފުރުސަތުތަކާ ގުޅޭގޮތުން މައުލޫމާތު ހިއްސާކޮށްފައިވެއެވެ. އޭގެއިތުރުން، ސުކޫލު ނިންމައި އަމަލީ މައިދާނަށް ނުކުންނައިރު އެ ކުއްޖަކު ކުރިއަށްދާނެ ދާއިރާއެއް އިހުތިޔާރުކުރާއިރު ވިސްނަންޖެހޭ ކަންކަމުގެ މައުލޫމާތު ހިއްސާކޮށްފައިވެއެވެ.

ސައިބަރ ބުލީންގ އަދި އިންޓަރނެޓް ސެކިއުރިޓީ ސެޝަނުގައި އިންޓަނެޓް ބޭނުންކުރާއިރު ދަރިވަރުން ހާއްސަ ސަމާލު ކަމެއް ދޭންޖެހޭ ކަންކަމާއި ރައްކާތެރިގޮތުގައި އިންޓަނެޓް ބޭނުންކުރާނެ ގޮތުގެ މައުލޫމާތު ދީފައިވެއެވެ. އަދި މައިންބަފައިންގެ ބެލުމުގެ ދަށުން އިންޓަނެޓް ބޭނުންކުރުމަށް ސަމާލުކަންދިނުމަށާއި އިންޓަނެޓުން ބައްދަލުވާ ނުދަންނަ އެއްވެސް ފަރާތަކަށް އެއްވެސް ކުއްޖެއްގެ ޒާތީ މައުލޫމާތު ހިއްސާނުކުރުމަށް ވެސް ދަރިވަރުންނަށް މައުލޫމާތު ހިއްސާކޮށްފައިވެއެވެ. އަދި އިންޓަނެޓް ބޭނުންކޮށް ހިންގާ އެކި ކުށްތަކާއި އެ ކުށްތަކުން ރައްކާތެރިވެތިބުމަށް ދަރިވަރުންނަށް ކުރެވޭނެ ކަންކަމާ ގުޅޭގޮތުން ވެސް މައުލޫމާތު ދީފައިވެއެވެ.

ހަމަ އެހެންމެ ސޯޝަލް މީޑިއާގައި ވެސް އެހެން މީހުންނަށް އިހުތިރާމުކުރުމަށާއި އެހެން މީހުންގެ އަގު ވައްޓާލައި މަލާމަތްކުރުމާއި އަބުރަށް ހުތުރު ނަމެއް ލިބޭނެފަދަ އެއްވެސް ކަމެއް ނުކުރުމަށް ދަރިވަރުންނަށް ނަސޭހަތްތެރިވެފައިވެއެވެ. އަދި އަހުލާގު ރަނގަޅު ކުއްޖެއް ކަމުގައިވުމަށާއި އެހެން ދަރިވަރުންނަށް ރަނގަޅު ނަމޫނާއެއް ދެއްކުމަށާއި މައިންބަފައިންނާއި ޓީޗަރުންގެ ލޯބި ހޯދައި، އެ ލޯބި ދެމެހެއްޓުމަށާއި ކިޔެވުމުގައި ގިނަވަގުތު ހޭދަކޮށް ދީނީ ކަންކަމަށް ސަމާލުކަންދިނުމަށް އަބަދުވެސް މަސައްކަތްކުރުމަށް ދަރިވަރުންނަށް ނަސޭހަތްތެރިވެފައިވެއެވެ. އޭގެއިތުރުން ވެސް، އިންޓަނެޓް މެދުވެރިކޮށް އާންމުކޮށް ހިންގާ ކުށްތަކާއި މިފަދަ ކުށްކުރާ މީހުންގެ ކިބައިން ދަރިވަރުންނާއި ދަރިވަރުން ބޭނުންކުރާ ޑިވައިސްތައް ރައްކާތެރިކުރާނެ ގޮތްތަކުގެ މައުލޫމާތު ވެސް މި ސެޝަނުގެ ތެރެއިން ދަރިވަރުންނަށް ހިއްސާކޮށްފައިވެއެވެ.