އިސްރަށްވެހިންނަށް މައުލޫމާތު ދިނުމުގެ ސެޝަނެއް ހުޅުމާލޭ އިސްރަށްވެހިންގެ ނާދީގައި ކުރިއަށް ގެންގޮސްފިއެވެ.

ވިކްޓިމް ސަޕޯޓާއި ހުޅުމާލޭގައި ހުންނަ އިސްރަށްވެހިންގެ ނާދީ ގުޅިގެން ކުރިއަށް ގެންދިޔަ މި ސެޝަންގައި މައުލޫމާތު ދީފައިވަނީ ނަފުސާނީ ދުޅަހެޔޮކަމާއި އިސްރަށްވެހިންނަށް ދިމާވެދާނެ އެކި ކަހަަލަ އަނިޔާތަކުން ރައްކާތެރިވުމާ ގުޅޭގޮތުންނެވެ.

މުނިފޫހި ފިލުވުމުގެ އެކި ކަހަލަ ހަރަކާތްތައް ހިމެނޭގޮތަށް ކުރިއަށް ގެންދިޔަ މި ސެޝަންގައި ނަފުސާނީ ދުޅަހެޔޮކަމަކީ ކޮބައިކަމާއި، ނަފުސާނީ ގޮތުންނާއި ޖިސްމާނީގޮތުން ދުޅަހެޔޮ މީހަކަށްވުމަށް ކުރެވިދާނެ ކަންތައްތަކާއި، އަމިއްލަ ނަފުސަށް އަޅައިލުމަށް ކުރެވިދާނެ ކަންތައްތަކާއި އޭގެ މުހިންމުކަމާ އަދި މައިންޑްފުލްނަސްއާ ބެހޭގޮތުން ވެސް މައުލޫމާތު ދީފައިވެއެވެ.

އޭގެ އިތުރުން، އިސްރަށްވެހިންނަށް ކުރިމަތިވެދާނެ އެކިކަހަލަ އަނިޔާތަކާއި އެފަދަކަމެއް ދިމާވެއްޖެނަމަ އަމަލުކުރަންޖެހޭ ގޮތްތަކާއި ރިޕޯޓުކުރާނެ ގޮތްތައް ކިޔައިދީފައިވެއެވެ.

ޖޫން 11 ވަނަ ދުވަހު ކުރިއަށް ގެންދިޔަ މި ސެޝަންގައި 21 އިސްރަށްވެހިން ބައިވެރިވިއެވެ.