ތ. އޮމަދޫ ސުކޫލު ގުރޭޑު 6 އިން މަތީގެ ދަރިވަރުން ހޭލުންތެރިކުރުވުމަށް މައުލޫމާތު ދިނުމުގެ ސެޝަންތަކެއް ކުރިއަށް ގެންގޮސްފިއެވެ.
ޖޫން 17 ވަނަ ދުވަހު މި ސެޝަންތައް ކުރިއަށް ގެންގޮސްފައިވަނީ ތިމަރަފުށީ ޕޮލިހާއި، އޮމަދޫ ޕޮލިސް ގުޅިގެންނެވެ.
މި ސެޝަންތަކުގައި މައުލޫމާތު ދީފައިވަނީ "ސައިބަރ ކުރައިމް އެންޑް ސޯޝަލް މީޑިއާ އެވެއާނެސް އަދި އެންޓި ބުލީންގ” އާ ގުޅޭގޮތުންނެވެ.
އެގޮތުން، ސައިބަރ ކުރައިމްގެ މައްސަލަތައް ކިޔައިދީ އަދި އެފަދަ މައްސަލަތަކުން ރައްކާތެރިވެ ތިބެވޭނެ ގޮތްތައް ކިޔައިދީފައިވެއެވެ. އަދި ސޯޝަލް މީޑިއާ ބޭނުންކުރާނަމަ ދަރިވަރުން ހާއްސަ ގޮތެއްގައި ސަމާލުކަންދޭންޖެހޭ ކަންތައްތަކާއި، ސޯޝަލް މީޑިއާއިން ބައްދަލުވާ މީހުންނާ ވާހަކަނުދެއްކުމަށާއި ޒާތީ މައުލޫމާތާއި ފޮޓޯފަދަ ތަކެތި ހިއްސާނުކުރުމަށް ކިޔައިދީފައިވެއެވެ.
އޭގެ އިތުރުން، ގަނާކުރުމުން ދުރުހެލިވެތިބުމަށާއި ސުކޫލުގައި ވިޔަސް އަދި އެހެން ތަނެއްގައި ވިޔަސް އެއްކުއްޖަކު އަނެއް ކުއްޖަކަށް ގަނާ ނުކުރުމަށާއި، އެކަމުގެ ސަބަބުން ދިމާވާނެ ނޭދެވޭ ކަންކަން ކިޔައިދީފައިވެއެވެ. އޭގެ އިތުރުން ވެސް މައުލޫއާ ގުޅޭގޮތުން އެކި މައުލޫމާތު ހިއްސާކޮށްފައިވެއެވެ.
