ފ. އަތޮޅު ރަށްރަށުގެ ސުކޫލު ދަރިވަރުންނާއި ބެލެނިވެރިން ހޭލުންތެރިކުރުވުމަށް މައުލޫމާތު ދިނުމުގެ ޕްރޮގްރާމެއް ކުރިއަށް ގެންގޮސްފިއެވެ.

މި ޖޫން މަހުގެ 21 އިން 24 އަށް މި ޕްރޮގްރާމް ކުރިއަށް ގެންގޮސްފައިވަނީ ޕަބްލިކް ޓްރަސްޓް އެންޑް ކޮންފިޑެންސް މެނޭޖްމަންޓާއި، ފ. އަތޮޅު ޕޮލިހާއި، ސުކޫލުތަކާއި ނިލަންދޫ ކައުންސިލު ގުޅިގެންނެވެ.

މި ޕްރޮގްރާމްގައި، ބެލެނިވެރިންނަށް މައުލޫމާތު ދީފައިވަނީ “ޖޮއިން ޕޮޒިޓިވް ޕޭރެންޓިންގ” ގެ ނަމުގައެވެ. އެގޮތުން، ކާމިޔާބު ބެލެނިވެރިޔާއަކީ ކޮބައިކަމާއި، ކާމިޔާބު ބެލެނިވެރިއެއްގެ ކިބައިގައި ހުންނާނެ ސިފަތަކާއި އެފަދަ ބެލެނިވެރިއެއްގެ ދައުރާ ގުޅޭގޮތުން މައުލޫމާތު ހިއްސާކޮށްފައިވެއެވެ. އަދި ކާމިޔާބު ބެލެނިވެރިއަކަށް ވުމަށް މަސައްކަތްކުރާނެ ގޮތްތަކާއި ދަރިންގެ މެދުގައި ތަފާތު ނުކުރުމަށާއި އެ ކުދިންގެ އަހުލާގު ރަނގަޅު ގޮތުގައި ބައްޓަން ކުރުމަށް ކުރެވިދާނެ ކަންކަމާ ގުޅޭގޮތުން މައުލޫމާތު ދީފައިވެއެވެ.

އޭގެ އިތުރުން، އެކި އުމުރުފުރާގައި ކުދިންގެ މިޒާޖަށް އަންނަ ބަދަލުތައް ދެނެގަންނާނެ ގޮތްތަކާއި މައިންބަފައިންގެ ލޯތްބާއި އަޅާލުންދީގެން ގޭތެރޭގެ ކަންކަމުގައި ވެސް ކުދިން ބައިވެރިކޮށް ޒިންމާދާރު ކުރުވުމަށް މަސައްކަތްކުރާނެ ގޮތްތަކާ ގުޅޭގޮތުން މައުލޫމާތު ދީފައިވެއެވެ. އަދި ބެލެނިވެރިންގެ ޒިންމާ އަދާކުރުމުގައި ދިމާވާ ގޮންޖެހުންތަކާއި އެ ކަންކަމުގައި އަމަލުކުރާނެ ގޮތްތަކުގެ މައުލޫމާތު ވެސް ހިއްސާކޮށްފައިވެއެވެ. މި ޕްރޮގްރާމުގައި، ބެލެނިވެރިންގެ މެދުގައި މަޝްވަރާކޮށް މައުލޫމާތު ދިނުމަށް ގުރޫޕު ހަރަކާތްތަކެއް ވެސް ކުރިއަށް ގެންގޮސްފައިވެއެވެ.

މި ޕްރޮގްރާމްގެ ތެރެއިން ސުކޫލުތަކުގެ ދަރިވަރުންނަށް މައުލޫމާތު ދީފައިވަނީ “ކާމިޔާބު ދަރިވަރު” އަދި “މޯޓިވޭޝަން އެންޑް ވެލިއުސް” ގެ ނަމުގައެވެ. އެގޮތުން، ދަރިވަރުންގެ އަހުލާގު ބައްޓަންކުރަންވީގޮތާއި، އަހުލާގު ރަނގަޅު ދަރިވަރެއްގެ ކިބައިގައި ހުންނާނެ ސިފަތަކާއި، ބެލެނިވެރިންނާއި މުދައްރިސުންގެ އިތުބާރު ދަމަހައްޓައި، ނަމޫނާ ދަރިވަރަކަށްވެވޭނެ ގޮތްތަކާއި ކާމިޔާބު ދަރިވަރަކަށް ވުމަށް ކުރެވިދާނެ ކަންތައްތައް ވެސް ކިޔައިދީފައިވެއެވެ.

މި ޕްރޮގްރާމުގައި މައުލޫމާތުދީފައިވަނީ ކޮންމެ ސުކޫލެއްގެ ވެސް ގުރޭޑު 8 އިން ފެށިގެން މަތީގެ ދަރިވަރުންނަށެވެ.