ކޮންމެ ދުވަހަކު ގައުމުގެ އަމަން އަމާންކަން ރައްކާތެރިކުރުމަށް މުޖުތަމައުގައި ތަންފީޒީ އިދާރާއެއްގެގޮތުން ފުލުހުންގެ ފަރާތުން ދެއްވާ ހިދުމަތަކީ ގައުމީ ވަރުގަދަ ހިދުމަތެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިފަދައިން ވިދާޅުވީ ފުލުހުންގެ 93 ވަނަ އަހަރީ ދުވަހުގެ ރަސްމީ ޖަލްސާ ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.

“މި މުއައްސަސާ ހަރުދަނާ މުއައްސަސާއަކަށް ވެގެންދަނީ ވަރަށް ގިނަ ކަންތައްތަކެއް އެކުލެވިގެން. އެންމެ މުހިންމު ކަންކަމުގެ ތެރޭގައި އިތުބާރުހުރި ގޮތެއްގައި ރައްޔިތުންނަށް އެންމެ އެދެވޭ ގޮތުގައި އެންމެ ފުރިހަމައަށް ވަރަށް ތެދުވެރިކަމާއި އަމާނާތްތެރިކަމާއެކު ހިދުމަތްދޭ މުއައްސަސާއަަކަށް ވެގެންދިޔުން. ކޮންމެ ދުވަހަކު ގައުމުގެ އަމަން އަމާންކަން ރައްކާތެރިކުރުމަށް މުޖުތަމައުގައި ތަންފީޒީ އިދާރާއެއްގެ ގޮތުން ފުލުހުންގެ ފަރާތުން ދެއްވާ ހިދުމަތަކީ ވަރުގަދަ ގައުމީ ހިދުމަތެއް. ވެވަޑައިގަންނަވާ ވަރަށް ބޮޑު ގުރުބާނީއެއް. އަދި ފުލުހުންގެ އާއިލާތަކުން ވެސް އެ ދެއްވަނީ ވަރުގަދަ ގައުމީ ހިދުމަތެއް، ޖިހާދެއް.” ރައީސުލްޖުމްހޫރިއްޔާ ވިދާޅުވިއެވެ.

މި ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިތުރަށް ވިދާޅުވީ، އެ މަނިކުފާނުގެ ވާޖިބަކީ އަދި ސިޔާސަތަކީ ފުލުހުންގެ މުއައްސަސާ ވަރުގަދަކުރުމުގައި މި ސަރުކާރުން އެންމެ އިސްކަމެއް ދޭނެކަންތައް ކަމަށެވެ. އަދި ދިފާއީ ހިދުމަތްތައް ވަރުގަދަ ކުރުމަށްޓަކައި، އިތުރަށް ހަރުދަނާކުރުމަށްޓަކައި ކުރަންޖެހޭ ކޮންމެ މަސައްކަތަކީ ގައުމީ މަަސައްކަތެއްކަމަށް ދެކިލައްވާކަމަށް ވިދާޅުވިއެވެ. އަދި އެ މަސައްކަތް ވަރުގަދަކަމާއި، ފުރިހަމަކަމާއި އިހުލާސްތެރިކަމާއެކީ ކުރުމުގައި މި ސަރުކާރު ދެމި އޮންނާނެކަމުގެ ފުރިހަމަ ޔަގީންކަން ފުލުހުންނަށާއި، ފުލުހުންގެ އާއިލާތަކަށާއި ރައްޔިތުންނަށް ދެއްވިއެވެ.

“މިދިޔަ ދެ އަހަރާއި ބައިގެ ތެރޭގައި ފުލުހުންގެ ޚިދުމަތުންވަނީ ގައުމުގައި ހުރި ދަތި އުނދަގޫ ކަންތަައްތައް ހައްލުކުރުމަށް ބޮޑެތި މަސައްކަތްތަކެއް ކޮށްފައި. އެތައް އަހަރެއް ވަންދެން ފުޅާވަމުން، މޫލަމުން، ހަރުލަމުން ގޮސްފައިވާ ނުރަނގަޅު އެތައް އާދަތަކަކުން މި މުޖުތަމައު ރައްކާތެރިކުރުމަށް، މި މުއައްސަސާގެ ހިދުމަތްތެރިން ވަނީ ބުރަ މަސައްކަތްތަކެއް ކޮށްފައި. ސަރުކާރުގެ އިޖުތިމާއީ ސިޔާސަތުގެ ތެރެއިން، ހަމަޖެހުމާއި ރައްކާތެރިކަން ގާއިމުކުރުމުގައި ރައްޔިތުންނާ އެންމެ ގާތުން ހިދުމަތްދޭ މުއައްސަސާއެއްގެ ގޮތުން ގިނަ ކަންތައްތަކެއްކޮށް ކާމިޔާބީތައް ހާސިލުކޮށްފައިވޭ.” ރައީސުލްޖުމްހޫރިއްޔާ ވިދާޅުވިއެވެ.

އޭގެ އިތުރުން، ޑްރަގުގެ ވަބާއިންނާއި، އާއިލާތަކުގެ ރައްކާތެރިކަން ކަށަވަރުކުރުމާއި، ޒުވާނުން ސަލާމަތްކޮށް ބޭނުންތެރި ބަޔަކަށް ހެދުމުގައްޔާއި، ގޭންގުކުށްތަކާއި، ނުގަވާއިދުން އުޅޭ ބިދޭސީންގެ މައްސަލަ ދާއިމީގޮތެއްގައި ހައްލުކުރުމަށް ފުލުހުން ދެއްވާ އެއްބާރުލުން އެމަނިކުފާނު ފާހަގަކުރެއްވިއެވެ. އަދި މިކަންތައްތަކުގެ ސަބަބުން މާނަހުރި، ދާއިމީ ބަދަލެއް މުޖުތަމައަށް އަންނާނެކަމަށާއި، އެއީ ފުލުހުން ކުރާ މަސައްކަތަކީ އިހުލާސްތެރިކަމާއި ހެޔޮ ނިޔަތާއި ގައުމީ ލޯތްބާއެކީ ވަކި ފަރާތަކަށް ނުޖެހި ސިޔާސީ ނުފޫޒުން އެއްކިބާވެ ހުރެ ކުރާ މިންނެތް މަސައްކަތްތަކަކަށް ވާތީ ކަމަށް ވެސް އެ މަނިކުފާނު ވިދާޅުވިއެވެ. އަދި ސަރުކާރުން ފުލުހުންނަށް ދޭންޖެހޭ ހުރިހާ އެއްބާރުލުމެއް ދެމުން ދާނެކަމަށާ، އެއީ ފަރުދީ ފެންވަރެއްގައި ވަކިވަކި ފުލުހުންގެ ތަމްރީނާ ގުޅުންހުރި ކަންކަަމަށްވިޔަސް އަދި މުއައްސަސާގެ އެކި ބަހާތައް ތަރަށްގީކުރުމަށް ބޭނުންވާނޭ އުމްރާނީ އަދި އިންސާނީ ވަސީލަތްތަކާ ގުޅޭ ކަންކަމަށްވިޔަސް ސަރުކާރުން އެ ކަންކަމަށް އިސްކަންދީގެން ފުރުސަތު ދެމުން ގެންދާނެކަމަށް ރައީސުލްޖުމްހޫރިއްޔާ ވިދާޅުވިއެވެ.

ހަމަ މިމޭރުމުން ވާހަކަފުޅު ދައްކަަވަމުން ރައީސުލްޖުމްހޫރިއްޔާ އިތުރަށް ވިދާޅުވީ، ފުލުހުންގެ ގާނޫނު މިހާރު ބައްޓަންކުރެވިފަ އޮތްގޮތުން ރައްޔިތުންނަށް އެންމެ ފުރިހަމަ ހިދުމަތެއް ދިނުމަށް ހުރަސްތަކެއް ކުރިމަތިވާކަމަށާއި، އެހެންކަމުން ފުލުހުންގެ ގާނޫނަށް އިސްލާހުތަކެއް ގެންނަންޖެހޭކަމަށް ގަބޫލުފުޅުކުރައްވާކަމަށޭވެ. އަދި އެކަމާ ގުޅިގެން ގެންނަން ޖެހޭ ބަދަލުތައް ދިރާސާކޮށް ސަރުކާރަށް ހުށަހެޅުމުން ސަރުކާރުން އެކަމާ ގުޅިގެން ކުރަންޖެހޭ ކަންތައްތައް ކުރައްވާނެކަމަށް ވިދާޅުވިއެވެ.

އަދި ފުލުހުންގެ ހިދުމަތް ރައްޔިތުންނަށް ދެމުން ގެންދަނީ ވަރަށް ގިނަ ދަތި އުނދަގޫތަކެއްގެ ތެރެއިންކަން ފާހަގަ ކުރައްވައި، އުމްރާނީ ވަސީލަތްތައް ތަރައްގީކުރުމުގެ ތެރެއިން، ދ.ވާނީގައި ހިންގާ ފުލުހުންގެ ޓްރެއިނިންގ ފެސިލިޓީއަކީ ސްޓޭޓް އޮފް ދަ އާޓް ފެސިލިޓީއެއް ގާއިމުކުރުމާއި، އައްޑޫގައި ގާއިމުކޮށްފައިވާ ޓްރެއިނިންގ ސެންޓަރުގެ އާބާތުރަ ފިލުވުމާއި، ބެލެހެއްޓުމަށް ހާއްސަ މަސައްކަތްތަކެއް ކުރާނެކަމަށް ވިދާޅުވިއެވެ. އޭގެ އިތުރުން، އިސްކަންދަރުކޮށި 2ގައި އައު އިމާރާތް ބިނާކުރުމާއި، ހުޅުމާލެ ފޭސް 2ގައި އެކަށީގެންވާ ޖާގަ ބޮޑު މަރުކަޒެއް އެޅުމަށް މި އަންނަ އަހަރުގެ ބަޖެޓުގައި ހިމަނާފައިވާނެކަަމަށާއި، ޝަހީދު ޙުސައިން އާދަމް ބިލްޑިންގއަކީ ޒަމާނަށް ފެތޭ ޖާގަ ތަނަވަސް ތަނަކަށް ހެދުމަށްޓަކައި މަސައްކަތްޕުޅު ކުރައްވާނެކަމަށާއި، ރާއްޖޭގެ އެކި ކަންކޮޅުތަކުގައި ގާއިމުކުރުމަށް ކަނޑައަޅާފައިވާ ފުލުހުންގެ އެކި ގިންތީގެ މަރުކަޒުތައް މި އަންނަ އަހަރު ނިންމުމަށް މަސައްކަތްޕުޅު ކުރައްވާނެކަމަށް ވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.