ދަރުމަވަންތަ ސްކޫލްގެ މުވައްޒަފުންގެ މެދުގައި އޮންނަ ގުޅުން ބަދަހިކޮށް، އެކަކު އަނެކަކަށް ކުރާ އިތުބާރު އިތުރުކުރުމުގެ ގޮތުން "ޓީމް ބިލްޑިންގ" ހަރަކާތްތަކެއް އެސްކޫލުގައި ކުރިއަށް ގެންގޮސްފިއެވެ.

2026 ޖުލައި 14 ވަނަ ދުވަހު ކުރިއަށް ގެންދިޔަ މި ހަރަކާތްތަކަކީ ދަރުމަވަންތަ ސްކޫލާއި، ނެއިބަރހުޑް ސަޕޯޓް އެންޑް ކްރައިމް ޕްރިވެންޝަން-ގަލޮޅު ޕޮލިސް އަދި ޕަބްލިކް ޓްރަސްޓް އެންޑް ކޮންފިޑެންސް މެނޭޖްމަންޓް ގުޅިގެން ހިންގި ޕްރޮގްރާމެކެވެ. މި ހަރަކާތުގައި އެ ސްކޫލުގެ އެކި ދާއިރާތަކުގައި މަސައްކަތްކުރާ ޖުމްލަ 95 މުވައްޒަފުން ބައިވެރިވެފައިވެއެވެ.

މި ޕްރޮގްރާމްގެ ބޭނުމަކީ މަސައްކަތުގެ މާހައުލުގައި އެކުވެރިކަމާއެކު ގުޅިގެން މަސައްކަތްކުރުމުގެ ރޫހު އާލާކުރުމެވެ. މިގޮތުން، މުއާމަލާތްކުރުމުގެ ހުނަރު ތަރައްގީކުރުމާއި އެކަކު އަނެކަކަށް އެހީތެރިކަން ފޯރުކޮށްދިނުމަށް ބާރުއަޅާ ތަފާތު ކުޅިވަރުތަކާއި ހަރަކާތްތައް މި ޕްރޮގްރާމަގައި ވަނީ ކުރިއަށް ގެންގޮސްފައެވެ.

މި ޕްރޮގްރާމަކީ ދިވެހި ފުލުހުންގެ ޚިދުމަތުން ސްކޫލްތަކާއި މުޖުތަމައާއި އެކި މުއައްސަސާތަކާ ގުޅިގެން، ގުޅުން ބަދަހިކުރުމަށާއި އިތުބާރު އުފެއްދުމަށް ކުރަމުންދާ މަސައްކަތްތަކުގެ ތެރެއިން ހިންގުނު މުހިންމު ހަރަކާތެކެވެ.

މިފަދަ ހަރަކާތްތަކުގެ ސަބަބުން މުވައްޒަފުންގެ މެދުގައި އޮންނަ ގުޅުން ވަރުގަދަވެ، މަސައްކަތުގެ މާހައުލަކީ އުފާވެރި އަދި އެކަކު އަނެކަކަށް އިހުތިރާމްކުރާ ތަނަކަށް ހެދުމަށް މަގުފަހިވެގެންދާނެއެވެ.