ބ. ތުޅާދޫ ސުކޫލު ބެލެނިވެރިންނަށް ސައިބަރ އެވެއާނަސް ސެޝަނެއް ކުރިއަށް ގެންގޮސްފިއެވެ. ޖުލައި 5 ވަނަ ދުވަހު މި ސެޝަން ކުރިއަށް ގެންގޮސްފައިވަނީ ބ. އަތޮޅު ފުލުހުންނާއި ތުޅާދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީ ގުޅިގެންނެވެ.

ސުކޫލު ބެލެނިވެރިންނާއި ކައުންސިލު މުވައްޒަފުން ބައިވެރިވި މި ސެޝަންގައި، ރަނގަޅު ގޮތުގައި ސޯޝަލް މީޑިއާ ބޭނުންކުރުމުން ލިބޭނެ ފައިދާތަކާއި، ނުރަނގަޅު ގޮތުގައި ބޭނުންކޮށްފިނަމަ ލިބޭނެ ގެއްލުންތައް ކިޔައިދީފައިވެއެވެ. އަދި ކުދިން އާންމުކޮށް ބޭނުންކުރާ ސޯޝަލް މީޑީއާ އެޕްލިކޭޝަންތަކާއި ގޭމުތައް ރައްކާތެރިގޮތުގައި ބޭނުންކުރާނެ ގޮތްތަކާ ބެހޭގޮތުން މައުލޫމާތު ދީފައިވެއެވެ.

އަދި އިންޓަނެޓް މެދުވެރިކޮށް އާންމުކޮށް ހިންގާ ކުށްތަކާއި، ސައިބަރ ގްރޫމިންއަކީ ކޮބައިކަމާއި އެފަދަ ކަންކަމުން ބެލެނިވެރިންނާއި ދަރިން ރައްކާތެރިވުމަށް ކުރެވޭނެ ކަންކަން ކިޔައިދީފައިވެއެވެ. އޭގެ އިތުރުން ވެސް، ސައިބަރ ސޭފްޓީއާ ގުޅުންހުރި އެކި މައުލޫމާތު މި ސެޝަންގެ ތެރެއިން ހިއްސާކޮށްފައިވެއެވެ.