ވ. ކެޔޮދޫ ފިހާރަތަކަށާއި ކެފޭ، ރެސްޓޯރަންޓުތަކަށް ޒިޔާރަތްކޮށް މައުލޫމާތު ދިނުމުގެ ހަރަކާތެއް ކުރިއަށް ގެންގޮސްފިއެވެ. މި ހަރަކާތަކީ ކުށްމަދު އަމާން މުޖުތަމައެއް ބިނާކޮށް ރައްޔިތުންނަށް ރައްކާތެރިކަން ކަށަވަރުކޮށްދިނުމަށް ފުލުހުން ކުރަމުންގެންދާ މަސައްކަތްތަކުގެ ތެރެއިން ކުރިއަށް ގެންދިޔަ ހަރަކާތެކެވެ.

މި މަހު 12 އިން 13 އަށް  ކެޔޮދޫ ޕޮލިހުގެ ފަރާތުން ކުރިއަށްގެންދިޔަ މި ހަރަކާތުގައި އެރަށުގެ ހުރިހާ ފިހާރައާއި ކެފޭ، ރެސްޓޯރަންޓުތަކަށް ޒިޔާރަތްކޮށް މައުލޫމާތު ހިއްސާކޮށްފައިވެއެވެ.

އެގޮތުން، ވިޔަފާރިތަކަށް އަމާޒުކޮށް ހިންގާ ސްކޭމްތަކާއި އެފަދަ ކުށްތަކުން ރައްކާތެރިވެ ތިބުމަށް ކުރެވޭނެ ކަންކަމާ ގުޅޭގޮތުން މައުލޫމާތު ހިއްސާކޮށްފައިވެއެވެ. އަދި އޮންލައިން ވިޔަފާރިތަކާއި މާކެޓް ޕްލޭސްގައި ވިޔަފާރިކުރާ ކަމަށް ދައްކައިގެން އުޅޭ މީހުންގެ އަމަލުތައް ދެނެގަންނާނޭ ގޮތާއި އެފަދަ މީހުންގެ މެސެޖުތައް ދެނެގަންނާނޭ ގޮތް ކިޔައިދީފައިވެއެވެ.

އޭގެ އިތުރުން، ސްކޭމްގެ މައްސަލަތަކުން ސަލާމަތްވުމަށާއި ކާކުކަން ނޭނގޭ މީހުން ގުޅައިގެން ވިޔަފާރީގެ މުއާމަލާތްކުރާނަމަ އެ މީހުން ދައްކާ ވާހަކައަށް ނުހެއްލި ސަމާލުވެ ރައްކާތެރިވެތިބުމަށް ނަސޭހަތްތެރިވެފައިވެއެވެ. އަދި އެފަދަ ފޯނު ކޯލުތަކަށް ޖަވާބުދާރީ ނުވުމަށާއި ތުހުމަތުކުރެވޭ ފަދަ ކަމެއް ފާހަގަކުރެވޭނަމަ އަމަލުކުރާނެ ގޮތްތައް ވެސް ކިޔައިދީފައިވެއެވެ.

ހަމައެހެންމެ، ވައްކަމުގެ މައްސަލަތަކުން ރައްކާތެރިވުމަށް ފިހާރަތަކުގެ ސަލާމަތާއި ރައްކާތެރިކަން ހުރި މިންވަރު ބަލައި އިތުރަށް ރަނގަޅުކުރަންޖެހޭ ކަމަށް ފުލުހުންނަށް ފާހަގަކުރެވުނު ކަންކަން ބުނެދީ އެ ކަންކަން ރަނގަޅުކުރުމަށް އިރުޝާދުދީފައިވެއެވެ.