ވިލިމާލޭގައި ހުންނަ މުހްޔިއްދީން ސުކޫލު ދަރިވަރުންނަށް އިންސްޕަޔަރިންގ ޔަންގ ލީޑާސް ޕްރޮގްރާމް ކުރިއަށް ގެންގޮސްފިއެވެ.

މި މަހު 15 ވަނަ ދުވަހު އެ ސުކޫލުގައި ކުރިއަށްގެންދިޔަ މި ޕްރޮގްރާމު ނިންމުމުގެ ރަސްމިއްޔާތު ޝަރަފުވެރިކޮށްދެއްވައި ދަރިވަރުންނަށް ސެޓްފިކެޓް  ހަވާލުކޮށްދެއްވީ މާލެ ޕޮލިސް ޑެޕިއުޓީ ހެޑް، ޗީފް ސުޕްރިންޓެ ންޑެންޓް އޮފް ޕޮލިސް އަޙްމަދު އަޒްހާންއެވެ. މި ރަސްމިއްޔާތުގައި ތިލަމާލެ ޕޮލިސް ހެޑް، ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބްއާއި، ވިލިމާލެ ޕޮލިސް ހެޑް، ޗީފް އިންސްޕެކްޓަރ އޮފް ޕޮލިސް އަލީ މުސްޠަފާއާއި މުހްޔިއްދީން ސުކޫލުގެ އިސްވެރިން ބައިވެރިވެލެއްވިއެވެ.

މި ޕްރޮގްރާމް ކުރިއަށް ގެންގޮސްފައިވަނީ ޕަބްލިކް ޓްރަސްޓް އެންޑް ކޮންފިޑަންސް މެނޭޖްމަންޓާއި ވިލިމާލެ ޕޮލިސް އަވައްޓެރި ފުލުހުން ގުޅިގެންނެވެ. އިންސްޕަޔަރިންގ ޔަންގ ލީޑާސް ޕްރޮގްރާމަކީ ސުކޫލު ނިންމައި، ދަރިވަރުން އަމަލީ މައިދާނަށް ނުކުންނައިރު އެ ދަރިވަރުންނަކީ މުޖުތަމައަށް ބޭނުންތެރި ހިދުމަތްތަކެއް ފޯރުކޮށްދޭނެ ދަރިވަރުންތަކެއް އުދެއްދުމަށާއި ކޮންމެ ދަރިވަރަކީ ވެސް ފަރުދީގޮތުން ޒިންމާދާރު އަދި ހަރުދަނާ ދަރިވަރަކަށް ވުމަށް އެ ދަރިވަރުންނަށް ބޭނުންވާނެ އެހީތެރިކަން ފޯރުކޮށްދިނުމަށް ކުރިއަށް ގެންދާ ޕްރޮގްރާމެކެވެ.

މި ޕްރޮގްރާމުގައި، އިޖުތިމާއީ ގުޅުންތައް ބަދަހިކުރުމުގެ މުހިންމުކަމާއި އަމިއްލަ ނަފުސަށް އޮންނަ އިތުބާރު ދެމެހެއްޓުމާއި ކުރިއަށް ދިއުމުގައި ވިސްނަންޖެހޭ ކަންކަން ބުނެދީފައިވެއެވެ. އަދި މުޖުތަމައުގައި އާންމުވަމުންދާ ކުށްތަކުން ރައްކާތެރިވާނެ ގޮތް ކިޔައިދިނުމާއެކު އަހުލާގު ރަނގަޅު، ނަމޫނާ ދަރިވަރެއްގެ ގޮތުގައި ދިރިއުޅުމުގެ އެކި މަރުހަލާތަކާ ކުރިމަތިލާނެ ގޮތް ދަސްކޮށްދީފައިވެއެވެ. އަދި ދަރިވަރުންގެ ޒިންމާތައް ބުނެދީ އެކަކު އަނެކަކާ ދެމެދު އޮންނަންޖެހޭ ގުޅުންތައް ދެމެހެއްޓުމާއި، ދިރިއުޅުމުގެ ރިވެތި އަދަބުތަކާއި ދީނީގޮތުން ދަރިވަރުން ސަމާލުކަންދޭންޖެހޭ ކަންކަމާއި މައިންބަފައިންނަށް ކަމޭހިތުމާ ގުޅޭގޮތުން މައުލޫމާތު ހިއްސާކޮށްފިއެވެ.

އޭގެ އިތުރުން، ޓީމެއްގެ ގޮތުގައި މަސައްކަތްކުރުމުގެ މުހިންމުކަމާއި ލީޑަރޝިޕްއާ ބެހޭ މައުލޫމާތުގެ އިތުރުން ޓީމް ބިލްޑިންގ ހަރަކާތްތައް ކުރިއަށް ގެންގޮސްފައިވެއެވެ.