ޔުނައިޓެޑް ސްޓޭޓްސް އޮފް އެމެރިކާގެ ޑިޕާޓްމަންޓް އޮފް ސްޓޭޓުން އިންތިޒާމުކޮށްގެން ކުރިއަށްގެންދާ "2026 ޑިސްޓިންގުއިޝްޑް ހަމްފްރީ ފެލޯޝިޕް ޕްރޮގްރާމް އޮން ކޮމްބެޓިންގ އިލިސިޓް ޑްރަގް ޓްރެފިކިންގ" ގައި ދިވެހި ފުލުހުންގެ ޚިދުމަތުގެ އެސިސްޓެންޓް ކޮމިޝަނަރ އޮފް ޕޮލިސް މުޙައްމަދު ޖަމްޝީދު ބައިވެރިވެވަޑައިގަންނަވަމުން އެބަގެންދަވައެވެ.

2026 އޮގަސްޓް 15 އިން ސެޕްޓެމްބަރު 1 ގެ ނިޔަލަށް އެމެރިކާގައި ކުރިއަށްދާ މި ފެލޯޝިޕް ޕްރޮގްރާމަކީ މަސްތުވާތަކެތީގެ ވިޔަފާރި ހުއްޓުވުމުގެ ދާއިރާއިން ފަންނީ އިލްމު ފުޅާކުރުމާއި، ސިޔާސަތުތައް އެކުލަވާލުމުގެ ގާބިލުކަން އިތުރުކުރުމުގެ އިތުރުން ބައިނަލްއަގުވާމީ އެއްބާރުލުން ހަރުދަނާކުރުމުގެ މަގުސަދުގައި ކުރިއަށްގެންދާ ޕްރޮގްރާމެކެވެ.

މި އަހަރުގެ ޕްރޮގްރާމް މައިގަނޑު ގޮތެއްގައި އަމާޒުކޮށްފައިވަނީ މަސްތުވާތަކެތި އުފެއްދުމާއި، އެއްތަނުން އަނެއްތަނަށް ގެންދިއުމާއި ވިއްކުން ހުއްޓުވުމަށް އެޅިދާނެ ސްޓްރެޓީޖިކް ފިޔަވަޅުތަކުގެ މައްޗަށެވެ. އެގޮތުން ފައިނޭންޝަލް މޮނިޓަރިންގ، މަސްތުވާތަކެތި އަތުލައިގަތުން (އިންޓަރޑިކްޝަން)، ޕްރީކަރސަރ ކެމިކަލްސް ރެގިއުލޭޓްކުރުން އަދި މަސްތުވާތަކެތީގެ ވިޔަފާރިކުރާ ނެޓްވަރކްތައް ހުއްޓުވުމަށް ގާނޫނު ތަންފީޒުކުރާ އިދާރާތައް ގުޅިގެން މަސައްކަތްކުރުމާ ގުޅޭގޮތުން އެމެރިކާގެ ތަޖުރިބާކާރުންގެ ފަރާތުން މައުލޫމާތާއި ތަޖުރިބާ ހިއްސާކުރެވޭނެއެވެ.

މިފަދަ ބައިނަލްއަގުވާމީ ޕްރޮގްރާމެއްގައި ފުލުހުންގެ އިސް އޮފިސަރަކު ބައިވެރިވެވަޑައިގަތުމަކީ މަސްތުވާތަކެތީގެ ވިޔަފާރިއާ ދެކޮޅަށް ރާއްޖޭގައި ކުރެވޭ މަސައްކަތްތައް އިތުރަށް ހަރުދަނާކޮށް، ބައިނަލްއަގުވާމީ އިދާރާތަކާއެކު އޮންނަ ގުޅުން ބަދަހިކުރުމަށް ލިބިގެންދާ މުހިންމު ފުރުސަތެކެވެ.