ފުލުހުންގެ ޚިދުމަތުގެ އަންހެން މުވައްޒަފުންނަށް “ފަޔަރ ފައިޓިންގ އެންޑް ޑިޒާސްޓަރ ރެސްޕޯންސް އެވެއާނެސް” ސެޝަނެއް ކުރިއަށް ގެންގޮސްފިއެވެ.

މި ސެޝަން ކުރިއަށް ގެންގޮސްފައިވަނީ މޯލްޑިވްސް ވިމެން އިން ޕޮލިސިންގއާއި، މޯލްޑިވްސް ނޭޝަނަލް ޑިފެންސް ފޯސް ގުޅިގެންނެވެ.

މިއަދު އިސްކަންދަރު ބިލްޑިންގގައި ކުރިއަށްގެންދިޔަ މި ސެޝަނަކީ ދުނިޔޭގެ ހިޔުމެނިޓޭރިއަން ދުވަހާ ގުޅުވައިގެން، މި ޚިދުމަތުގެ އަންހެން މުވައްޒަފުން ހޭލުންތެރިކުރުވުމަށް ކުރިއަށްގެންދިޔަ ސެޝަނެކެވެ.

މި ސެޝަނުގައި، އާންމުގޮތެއްގައި އަލިފާނުގެ ހާދިސާތައް ހިނގަން މެދުވެރިވާ ސަބަބުތަކާއި، އެފަދަ ހާދިސާއެއް ކުރިމަތިވެއްޖެނަމަ އަމަލުކުރާނެ ގޮތްތައް ކިޔައިދީފައިވެއެވެ. އަދި އަލިފާނުގެ ހާދިސާތަކުން ރައްކާތެރިވެތިބުމަށް ކުރެވޭނެ ކަންތައްތަކާއި، ދިމާވާ ކުއްލި ހާލަތްތަކުގައި އަމަލުކުރާނެ ގޮތްތަކާއި، އަލިފާން ނިއްވާ އާލާތްތައް ބޭނުންކުރާނެގޮތްތަކާ ބެހޭގޮތުން މައުލޫމާތު ދީފައިވެއެވެ.

ހޭލުންތެރިކުރުމުގެ މިފަދަ ސެޝަންތަކުގެ ސަބަބުން، އަލިފާނުގެ ހާދިސާތަކުން ރައްކާތެރިވުމަށް އަޅަންޖެހޭ ފިޔަވަޅުތަކާއި، ކުއްލި ހާލަތެއް ދިމާވެއްޖެނަމަ އަމަލުކުރާނެ ގޮތްތަކާއި، ރައްކާތެރިވުމުގެ ގޮތުން ދުރާލާ އެޅޭނެ ފިޔަވަޅުތައް އެނގިގެންދާނެއެވެ.