ރާއްޖޭގެ ހުރިހާ ހިސާބެއްގެ ސުކޫލުތަކުގައި ކުރިއަށްގެންދިޔަ ކޭމްޕުތަކުގައި ފުލުހުން ބައިވެރިވެ ދަރިވަރުން ހޭލުންތެރިކުރުވުމަށް މައުލޫމާތު ދިނުމުގެ ސެޝަންތަކާއި ޓީމް ބިލްޑިންގ ހަރަކާތްތަކެއް ކުރިއަށް ގެންގޮސްފިއެވެ.

މި ކޭމްޕުތަކަކީ ސުކޫލުތަކުގެ “ސްކައުޓް، ކަބް ސްކައުޓް އަދި ގާލް ގައިޑް” ދަރިވަރުންނަށް ކުރިއަށްގެންދިޔަ ކޭމްޕުތަކެކެވެ. މާލެ ސަރަހައްދާއި ރާއްޖޭގެ އެކި ހިސާބުތަކުގެ ސުކޫލުތަކުގައި ކުރިއަށް ގެންދިޔަ މި ކޭމްޕުތަކުގައި ފުލުހުން ބައިވެރިވެ، އެކި ދާއިރާތަކަށް ދަރިވަރުން އަހުލުވެރިކުރުވައި ކުށުން ރައްކާތެރިކުރުވުމަށް މައުލޫމާތު ދީފައިވެއެވެ.

އެގޮތުން، ރައްކާތެރިކަމާއެކު އިންޓަނެޓް ބޭނުންކުރާނެ ގޮތާއި، ޑިޖިޓަލް މާހައުލެއްގައި ހުރި ރިސްކުތަކަކީ ކޮބައިކަމާއި، އަމިއްލަ މައުލޫމާތު ހިއްސާކުރުމުގެ ނުރައްކާތަކާއި، ރައްކާތެރިކަމާއެކު އޮންލައިން ހިދުމަތް ބޭނުންކުރުމުގައި އަމަލުކުރާނެ ރަނގަޅުގޮތްތަކާއި، ސައިބަރ ބުލީންގއިން ރައްކާތެރިވުމުގެ މައްޗަށް މައުލޫމާތު ދީފައިވެއެވެ. އަދި ދަރިވަރުންގެ ކިބައިގައި ރަނގަޅު އާދަތައް އަށަގަންނުވައި، މުޖުތަމައުގައި ހިނގާ ނޭދޭވޭ ކަންކަމުން ދަރިވަރުން ރައްކާތެރިކުރުވުމަށާއި، މުޖުތަމައަށް ފައިދާހުރި ހަރުދަނާ ބައެއްގެ ގޮތުގައި އަމަލީ މައިދާނަށް ނުކުތުމަށް މަސައްކަތްކުރާނެ ގޮތްތައް ކިޔައިދީފައިވެއެވެ. އަދި މަގުމަތީގެ ސަލާމަތާއި ރައްކާތެރިކަމާއި، އެކަކު އަނެކަކަށް އިހުތިރާމުކުރުމާއި، ވަގުތަށް ކަމޭހިތުމާއި، ތެދުވެރިކަމާއި، އަމާނާތްތެރިކަމާއި، މަގުމަތީގެ އަދަބުތަކުގެ އިތުރުން އާންމު އިޖުތިމާއީ މިންގަނޑާ ހިލާފު ކަންތައްތަކުން ދުރުހެލިވެތިބުމަށް މަސައްކަތްކުރުމަށް ދަރިވަރުންނަށް މައުލޫމާތު ދީފައިވެއެވެ.

އޭގެ އިތުރުން، ދިމާވެދާނެ ކުއްލި ހާލަތްތަކުގައި އަމަލުކުރާނެ ގޮތްތަކާއި، އަމިއްލަ ސަލާމަތާއި ރައްކާތެރިކަމަށް ސެލްފް ޑިފެންސް ކުލާސްތަކާއި، އަލިފާނުގެ ހާދިސާތަކުން ރައްކާތެރިކަން ހޯދާނެ ގޮތްތައް ވެސް ކިޔައިދީފައިވެއެވެ. އަދި ޖިސްމާނީ ދުޅަހެޔޮކަން އިތުރުކުރުމަށް ޕީޓީ ކުލާސްތަކާއި، ގުޅިގެން މަސައްކަތްކުރުމުގެ ރޫހު އަށަގެންނެވުމުގެ ގޮތުން ޓްރެޝަރ ހަންޓް ހަރަކާތްތަކުގެ އިތުރުން ޓީމެއްގެ ގޮތުގައި މަސައްކަތްކުރުމުގެ މުހިންމުކަން ބުނެދިނުމާއެކު ޓީމް ބިލްޑިންގ ހަރަކާތްތަކާއި ސުވިމިންގ ކުލާސްތައް ވެސް ކުރިއަށް ގެންގޮސްފައިވެއެވެ.

މިފަދަ ހަރަކާތްތަކުގެ މައިގަނޑު ބޭނުމަކީ ދަރިވަރުންގެ ކިބައި ރަނގަޅު އަހުލާގު އަށަގެންނެވުމާއި، ޒިންމާދާރުކުރުވުމާއި، ފަރުދީ ޒިންމާ އަދާކުރަން ދަސްކޮށްދިނުމާއި، ކުށުން ދުރުހެލިވުމަށް ބާރުއެޅުމާ އަދި ރައްކާތެރި މުޖުތަމައެއް ބިނާކުރުމެވެ.