ޓެކްސީ ޑްރައިވަރުންނަށް ހާއްސަކޮށްގެން ކުރިއަށްގެންދާ “ޓެކްސީ ޑްރައިވަރސް” ޕްރޮގްރާމް ހއ. ދިއްދޫ ޓެކްސީ ޑްރައިވަރުންނަށް ކުރިއަށް ގެންގޮސްފިއެވެ.

މި ޕްރޮގްރާމަކީ އެއްގަމު ދަތުރުފަތުގެ ގާނޫނުން ޓެކްސީ ޑްރައިވަރުންގެ މައްޗަށް ލާޒިމުކޮށްފައިވާ، ޓެކްސީކުރުމަށް ނަގަންޖެހޭ ހުއްދައަކީ މި ޕްރޮގްރާމު ފުރިހަމަކޮށްފައިވާ ޑްރައިވަރުންނަށް ދޫކުރާ ހުއްދައަކަށްވާތީ ހއ. ދިއްދޫ ޕޮލިހާއި، ރޯޑް ސޭފްޓީ އެވެއަރނަސް އެންޑް ޕްރިވެންޝަން ގުޅިގެން ހިންގި ޕްރޮގުރާމެކެވެ.

މި ޕްރޮގްރާމުގައި، މަގުމަތީގެ ސަލާމަތާއި ރައްކާތެރިކަމަށް ހެދިފައިވާ އެއްގަމު ދަތުރުފަތުރުގެ އާންމު ގަވާއިދުތަކާއި ގާނޫނަށް ޑްރައިވަރުން އަހުލުވެރިކުރުވުމަށް މައުލޫމާތު ދީފައިވެއެވެ. އަދި ޑްރައިވަރުން އުޅަނދު ދުއްވާއިރުއާއި ދަތުރަށް ތައްޔާރުވުމުގައި ސަމާލުކަންދޭންޖެހޭ ކަންކަމުގެ މައުލޫމާތު ވެސް ދީފައިވެއެވެ. އަދި މަގު ބޭނުންކުރާއިރު ސަމާލުކަންދޭންޖެހޭ ކަންކަމުގެ އިތުރުން، ސަލާމަތީ އަދި ކުއްލި ހާލަތްތަކުގައި އަމަލުކުރާނެ ގޮތްތައް ކިޔައިދީފައިވެއެވެ. އޭގެ އިތުރުން، އުޅަނދު ދުއްވާއިރު ކުށަކަށް މަގުފަހިވާނެ ފަދަ ގޮތަކަށް އަމަލުތައް ނުބެހެއްޓުމަށް ނަސޭހަތްތެރިވެފައިވެއެވެ.

މި މަހު 9 ވަނަ ދުވަހު އޮންލައިންކޮށް ކުރިއަށްގެންދިޔަ މިޕްރޮގްރާމު ފުރިހަމަކޮށް ޓެސްޓުން ފާސްވި ފަރާތްތަކަށް، ޓެކްސީ ޑްރައިވަރސް ޕްރޮގްރާމު ފުރިހަމަކުރިކަމުގެ ލިޔުން ހަވާލުކޮށްފައިވެއެވެ. މި ޕްރޮގްރާމުގައި މައުލޫމާތު ދެއްވީ ރޯޑް ސޭފްޓީ އެވެއަރނަސް އެންޑް ޕްރިވެންޝަން އޮފިސަރުންނެވެ.