ސުކޫލު ދަރިވަރުންނާއި ބެލެނިވެރިން ކުށްމަދު އަމާން މާހައުލަކަށް އަހުލުވެރިކުރުވައި ފަރުދީ ޒިންމާ އަދާކުރުވުމަށް ބާރުއެޅުމަށް ފުލުހުން ކުރަމުންގެންދާ މަސައްކަތްތަކުގެ ތެރެއިން ނ. މަގޫދޫ ސުކޫލު ބެލެނިވެރިން ހޭލުންތެރިކުރުވުމަށް ސައިބަރ އެވެއާނެސް ސެޝަނެއް ކުރިއަށް ގެންގޮސްފިއެވެ.

އެ ސުކޫލުގައި މިއަދު ކުރިއަށްގެންދިޔަ ސެޝަނުގެ މައިގަނޑު މަގުސަދަކީ އިންޓަނެޓާއި ޑިޖިޓަލް ވަސީލަތްތައް ރައްކާތެރި ގޮތުގައި ބޭނުންކުރާނެ ގޮތުގެ މައުލޫމާތު ބެލެނިވެރިންނަށް ފޯރުކޮށްދިނުމެވެ.  މި ސެޝަނަކީ މަގޫދޫ ޕޮލިހާއި ސުކޫލު ގުޅިގެން ކުރިއަށްގެންދިޔަ ސެޝަނެކެވެ.

މި ސެޝަންގައި، ދަރިން މޯބައިލް ފޯނާއި އިންޓަނެޓް ބޭނުންކުރާއިރު ބެލެނިވެރިން ސަމާލުކަންދޭންޖެހޭ މުހިންމު ކަންކަމާއި، ކުދިން ކުރާ ކަންކަން މޮނީޓަރކޮށް ބެލެހެއްޓުމުގެ މުހިންމުކަމަށް އަލިއަޅުވައި މައުލޫމާތު ދީފައިވެއެވެ. އަދި ހެޔޮގޮތުގައި އިންޓަނެޓް ބޭނުންކުރުމާއި، ދަރިން މޯބައިލް ފޯނާއި އިންޓަނެޓް ބޭނުންކުރާއިރު، މޮނީޓަރކުރަމުން ދިއުމާއި، ޕޭރެންޓަލް ލޮކްކޮށްގެން ބެލެހެއްޓުމުގެ އިތުރުން ސައިބަރ ބުލީންގ އިން ރައްކާތެރިވެގެން ތިބުމަށް މައުލޫމާތު ދީފައިވެއެވެ.

އޭގެ އިތުރުން، އިންޓަނެޓް މެދުވެރިކޮށް ކުޑަކުދިންނަށް ކުރާ ފުރައްސާރަތައް ހުއްޓުވުމަށް މަސައްކަތްކުރާނެ ގޮތްތަކާއި ދަރީންގެ އަހުލާގު ރަނގަޅުކުރުމަށް ކުރެވޭނެ ކަންކަމުގެ މައުލޫމާތު ވެސް ހިއްސާކޮށްފައިވެއެވެ.

މިފަދަ ޕްރޮގްރާމުތަކުގެ ސަބަބުން ޓެކްނޮލޮޖީގެ ނުރައްކާތަކުން ކުދިން ސަލާމަތްކޮށް، ރައްކާތެރި ޑިޖިޓަލް މާހައުލެއް ދިރިއުޅޭ މާހައުލުގައި ގާއިމުކުރުމަށް ބެލެނިވެރިން އަހުލުވެރިވެގެންދާނެއެވެ.