ހުޅުމާލޭގައި ހިނގާ އެކްސިޑެންޓްތައް މަދުކުރުމަށް މެސެޖުތަކާއެކު ހުޅުމާލެ ފޭސް 1 އަދި ފޭސް 2 ގެ ފުލުހުން މަގުމައްޗަށް ނުކުމެ ހޭލުންތެރިކުރުވުމަށް ސައިލެންޓް ހަރަކާތެއް ހިންގައިފިއެވެ.
މިއަދު ކުރިއަށް ގެންދިޔަ މި ހަރަކާތަކީ މަގުމަތީގެ އަމާންކަމާއި ރައްކާތެރިކަން ކަށަވަރުކޮށް، މަގުމަތީގައި ހިނގާ ނުރައްކާތެރި އެކްސިޑެންޓްތައް މަދުކުރުމަށް ރައްޔިތުން ހޭލުންތެރިކުރުވުމުގެ މަގުސަދުގައި ކުރިއަށް ގެންދިޔަ ހަރަކާތެކެވެ. މި ހަރަކާތް ކުރިއަށް ގެންގޮސްފައިވަނީ މިއަދު ހެނދުނު 7:15 އިން ފެށިގެން ހުޅުމާލެ ފޭސް 2 މުޅި ނިރޮޅުމަގު ހިމެނޭ ގޮތަށެވެ.
މި ހަރަކާތަކީ ޓްރެފިކާ ގުޅުންހުރި، އާންމު ރައްކާތެރިކުރުމުގެ މެސެޖުތައް ހިމެނޭ ބޯޑުތައް ހިފައިގެން ހިންގި ހަރަކާތެކެވެ. މިފަދަ ހަރަކާތްތަކުގެ ސަބަބުން، ރައްކާތެރިކަމާއެކު އުޅަނދު ދުއްވުމަށާއި އެކްސިޑެންޓްތައް މަދުކުރުމަށް ރައްޔިތުންނަށް މުހިންމު މެސެޖުތަކެއް ލިބިގެންދާނެއެވެ.
އެކްސިޑެންޓްތައް މަދުކުރުމަށާއި މަގުމަތީގެ އަމާންކަމާއި ރައްކާތެރިކަމަށް ރައްޔިތުން ހޭލުންތެރިކުރުވުމަށް ހުޅުމާލެ ޓްރެފިކް ޕޮލިހުން އަންނަނީ ގިނަ މަސައްކަތްތަކެއް ކުރަމުންނެވެ.
