ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުން ހިންގާ އިންވެސްޓިގޭޝަން އޮފިސަރ ކޯހުގެ 32 ވަނަ ބުރު ފަށައިފިއެވެ.
މި މަހުގެ 27 ވަނަ ދުވަހު ދ. ވާނީގައި 25 ފުލުހުންނާއެކު ފެށި މި ކޯހަކީ، އިންވެސްޓިގޭޝަން އޮފިސަރުން އުފެއްދުމަށާއި، އެ އޮފިސަރުންގެ ގާބިލުކަން ތަރައްގީކުރުމުގެ އިތުރުން ކްރިމިނަލް އިންވެސްޓިގޭޝަން ދާއިރާގެ އިލްމާއި ހުނަރު އުނގަންނައިދިނުމަށް ފަރުމާކުރެވިގެން ހިންގާ ކޯހެކެވެ.
މި ކޯހުގައި ކިޔަވައިދޭ ބައިތަކުގެ ތެރޭގައި ކްރައިމް ސީން އިންވެސްޓިގޭޝަން، އިންވެސްޓިގޭޓިވް އިންޓަވިއުއިންގ، ގެދަރިންގ އެވިޑެންސް އަދި ކޭސް ޕްރެޒެންޓޭޝަން ހިމެނެއެވެ. މީގެއިތުރުން ގާނޫނީ ކުލާސްތަކާއި، އިންޓަވިއު ކުރުމުގެ ހުނަރުތަކުގެ އިތުރުން ކޯޓުގެ އެކި މަރުހަލާތަކުގައި ކަންކަން ކުރިއަށްގެންދާނެ ގޮތްތައް އުނގަންނައިދެވޭނެއެވެ.
މި ކޯހުގެ ކިޔެވުމާއި އެޓޭޗްމަންޓް ފުރިހަމަކުރުމުން، އިންވެސްޓިގޭޝަން އޮފިސަރެއްގެ ގޮތުގައި މަސައްކަތްކުރުމުގެ ފުރިހަމަ ގާބިލުކަން ފުލުހުންނަށް ލިބިގެންދާނެއެވެ.
