ސްކޫލު ގަޑިތަކުގައި ދަރިވަރުންނަށް އަމާން އަދި ރައްކާތެރި މާހައުލެއް ގާއިމުކޮށްދިނުމަށާއި މަގުމަތީގެ ޓްރެފިކް ތަރުތީބުކުރުމަށް ބާރުއެޅުމުގެ ގޮތުން، ރެހެންދި ސްކޫލުގެ ގޭޓު ސަރަހައްދުގައި ޕާކުކުރުން މަނާކަން އަންގައިދޭ ހާއްސަ ބޯޑެއް ބަހައްޓައި އިފްތިތާހުކޮށްފިއެވެ.

ހުޅުމާލެ ޓްރެފިކް ޑިޕާޓްމަންޓުން އިސްނަގައިގެން ކުރިއަށްގެންދިޔަ މި ހަރަކާތުގެ ދަށުން ބެހެއްޓި ބޯޑު ރަސްމީކޮށް އިފްތިތާހުކޮށްދެއްވީ ހުޅުމާލެ ޕޮލިސްގެ ހެޑް، އެސިސްޓެންޓް ކޮމިޝަނަރ އޮފް ޕޮލިސް އާޞިމް ޢަބްދުﷲ އަދި ރެހެންދި ސްކޫލުގެ ޕްރިންސިޕަލް ނާޒިމް ޢަބްދުﷲ އެވެ. މި ބޯޑު ހާއްސަވަނީ މަގުމަތީގެ ރައްކާތެރިކަމާ ގުޅޭގޮތުން ދަރިވަރުން އަމިއްލައަށް ދީފައިވާ މުހިންމު މެސެޖުތައް އޭގައި ހިމަނައިގެން ފަރުމާކޮށްފައިވާތީއެވެ.

މި ބޯޑަކީ ދަރިވަރުން ސްކޫލަށް ގެންނަ ވަގުތުތަކުގައާއި ސްކޫލު ނިމިގެން ބަލައި އަންނަ ގަޑިތަކުގައި، ސްކޫލުގެ ގޭޓުތައް ކުރިމައްޗަށް ވާގޮތަށް ބެލެނިވެރިން ސައިކަލު ޕާކުކުރުމުގެ ސަބަބުން ދަރިވަރުންނަށް ކުރިމަތިވާ ދަތިތަކާއި ނުރައްކާތަކަށް ދާއިމީ ހައްލެއް ހޯދައިދިނުމުގެ ގޮތުން ބެހެއްޓުނު ބޯޑެކެވެ. އަދި ސްކޫލު ސަރަހައްދުގެ މަގުތައް ތޮއްޖެހުނަނުދީ، ދަރިވަރުންނާއި ހިނގާބިނގާވެ އުޅޭ ފަރާތްތަކަށް ފަސޭހަކަމާއެކު ހަރަކާތްތެރިވެވޭނެ އިންތިޒާމު ހަމަޖެއްސުމެވެ.

މި ހަރަކާތުގައި ހުޅުމާލެ ޕޮލިސްގެ ސީނިއަރ އޮފިސަރުންނާއި، ޓްރެފިކް ޑިޕާޓްމަންޓުގެ އިސްވެރިންގެ އިތުރުން ރެހެންދި ސްކޫލުގެ ޑެޕިއުޓީ ޕްރިންސިޕަލުންނާއި، ޓީޗަރުން، ބެލެނިވެރިން އަދި ގިނަ އަދަދެއްގެ ދަރިވަރުން ބައިވެރިވިއެވެ.

ހުޅުމާލޭގެ މަގުތަކަކީ ހިނގާ މީހުންނަށާއި އުޅަނދުފަހަރަށް އަމާން، ރައްކާތެރި ތަނަކަށް ހެދުމަށާއި ނުރައްކާތެރި އެކްސިޑެންޓްތައް މަދުކުރުމަށްޓަކައި، އާންމުން ހޭލުންތެރިކުރުވުމަށާއި މަގުމަތީގެ އަހުލާގު ރަނގަޅުކުރުމަށް ހުޅުމާލެ ޓްރެފިކް ޕޮލިހުން އަންނަނީ މެދުކެނޑުމެއް ނެތި ގިނަ މަސައްކަތްތަކެއް ކުރަމުންނެވެ.