މަސްތުވާތަކެތީގެ މައްސަލައެއްގައި ބ. ކަމަދޫއިން މީހަކު ހައްޔަރުކޮށްފިއެވެ.
މި މައްސަލައާ ގުޅިގެން ހައްޔަރުކޮށްފައި ވަނީ ބ. ކަމަދޫ / ހުވަނދުމާގެ، ޔޫސުފް ޞިދުޤީ (36އ) އެވެ. އޭނާ ހައްޔަރުކޮށްފައި ވަނީ މަސްތުވާތަކެތި ގެންގުޅެ އެ ތަކެތި ބޭނުންކޮށް ވިއްކައި ވިޔަފާރިކުރާކަމުގެ ތުހުމަތުގައި ކަމަދޫ ފުލުހުން ހިންގި އޮޕަރޭޝަންގައެވެ.
ސެޕްޓެމްބަރު 29 ވަނަ ދުވަހު އެ ރަށު މަގުމަތިން އޭނާ ހުއްޓުވި ވަގުތު، އޭނާ ލައިގެންހުރި ޖީންސުގެ ޖީބުގައި އޮތް އެއްޗެއް ނަގައި އެއްލައިލާފައިވެއެވެ. އެހެންކަމުން ފުލުހުން އެ ނަގައި، ބަލައިފާސްކުރިއިރު މަސްތުވާތަކެތިކަމަށް ޝައްކުކުރެވޭ އެއްޗެއް ހުރި ހަތަރު ކަރުދާސްކޮޅު ފެނިފައިވެއެވެ.
މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 10 ދުވަހަށް ބަންދުގައި ބެހެއްޓުމަށް އަމުރުކޮށްފައިވެއެވެ.
މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.
