ދަރުމަވަންތަ ސުކޫލާއި، ޣިޔާސުއްދީން އިންޓަނޭޝަނަލް ސުކޫލު އަދި އިމާދުއްދީން ސުކޫލު ދަރިވަރުންނަށް ކުރިއަށްގެންދިޔަ ޓްރެފިކް މޮނީޓާސް ޕްރޮގްރާމް ނިންމުމުގެ ރަސްމިއްޔާތު ބާއްވައިފިއެވެ.
މި ޕްރޮގްރާމް ނިންމުމަށް މި މަހު 1 ވަނަ ދުވަހު ޣިޔާސުއްދީން އިންޓަނޭޝަނަލް ސުކޫލުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ދަރިވަރުންނަށް ސެޓްފިކެޓާއި ޓެގު ހަވާލުކޮށްދެއްވީ ކޮންޓްރޯލަރ ޖެނެރަލް އޮފް އިމިގްރޭޝަން އަދި ކޮމިޝަނަރ އޮފް ޕޮލިސް (ރިޓަޔާޑް) އަޙުމަދު ފަސީޙުއެވެ. މި ރަސްމިއްޔާތުގައި ފުލުހުންގެ ސީނިއަރ ބައެއް އޮފިސަރުންނާއި ތިން ސުކޫލުގެ އިސްވެރިން ބައިވެރިވެލެއްވިއެވެ.
މި ރަސްމިއްޔާތުގައިޝަރަފުވެރި މެހުމާނު ދެއްކެވި ވާހަކަފުޅުގައި، ބަވަނަވަމުން އަންނަ ދުނިޔޭގައި ޓްރެފިކް މައްސަލަތައް ހައްލުކުރުމަށްޓަކައި ފުރާވަރު ކުދިންނަށް މިފަދަ ޕްރޮގްރާމްތަކަކީ ވަރަށް މުހިންމު އަދި މުސްތަގުބަލުގައި ބޭނުންހިފޭނެ ޕްރޮގްރާމަކަށް ވާނެކަން ފާހަގަކުރެއްވިއެވެ. އަދި މި ޕްރޮގްރާމް ހުއްޓައިނުލައި ދަރިވަރުންނަށް ކުރިއަށް ގެންދިއުމަށާއި މި ޕްރޮގްރާމް ނިންމާ ދަރިވަރުންގެ މަސައްކަތް، ޓްރެފިކް ފުލުހުން މެދުވެރިކޮށް އަބަދުވެސް ގާތުން ބަލައި މޮނީޓަރކުުރުމާއެކު އެ ކުދިންގެ ރައްކާތެރިކަން ކަށަވަރުކޮށްދިނުމަށް ފުލުހުންގެ ކިބައިން އެދިލެއްވިއެވެ.
މިދިޔަ ސެޕްޓެމްބަރު މަހުގެ 26 އިން އޮކްޓޫބަރު 1 އަށް ކުރިއަށްގެންދިޔަ މި ޕްރޮގްރާމުގައި، ތިން ސުކޫލު ހިމެނޭގޮތަށް 103 ދަރިވަރުންނާއި 11 ކޯޑިނޭޓަރުން ބައިވެރިވެ ކާމިޔާބުކަމާއެކު މި ޕްރޮގްރާމު ފުރިހަމަކޮށްފައިވެއެވެ.
ޓްރެފިކް މޮނީޓާސް ޕްރޮގްރާމްގައި، އެއްގަމު ދަތުރު ފަތުރުގެ ގާނޫނާއި ގަވާއިދުތަކުގެ މައުލޫމާތު ދިނުމާއި ދަރިވަރުންގެ އަމިއްލަ ނަފުސުގެ ސަލާމަތާއި ރައްކާތެރިކަމަށް ކުރެވިދާނެ ކަންކަމުގެ މައުލޫމާތު ހިއްސާކޮށްފައިވެއެވެ. އޭގެ އިތުރުން، މުއާމަލާތުކުރުމުގެ ހުނަރުތައް ދަސްކޮށްދިނުމާއި ޓްރެފިކް ބެލެހެއްޓުމާ ގުޅޭގޮތުން މަގުމަތީގައި ދަރިވަރުންނަށް އަމަލީ ހަރަކާތްތައް ކުރިއަށް ގެންގޮސްފައިވެއެވެ.
ޓްރެފިކް މޮނީޓާސް ޕްރޮގްރާމަކީ ސުކޫލުތައް ހިމެނޭ ސަރަހައްދުގެ ޓްރެފިކް ބެލެހެއްޓުމުގައި ދަރިވަރުންގެ ބައިވެރިވުން އިތުރުކުރުމާއި މަގުމަތީގެ ސަލާމަތާއި ރައްކާތެރިކަމަށް ދަރިވަރުން ހޭލުންތެރިކޮށް ޓްރެފިކް މައްސަލަތައް ހައްލުކުރުމުގެ ރޫހު އަށަގެންފައިވާ ދަރިވަރުންތަކެއް އުފެއްދުމަށް ކުރިއަށްގެންދާ ޕްރޮގްރާމެކެވެ.
