ކުރެންދޫގައި ހުންނަ ޅ. އަތޮޅު ސުކޫލު ދަރިވަރުންނަށް ލީޑަރޝިޕް ކޭމްޕު ކުރިއަށް ގެންގޮސްފިއެވެ. މި މަހު 3 ވަނަ ދުވަހު އެ ސުކޫލުގެ ޔަންގް ލީޑަރުންގެ ގޮތުގައި ހަރަކާތްތެރިވާ ދަރިވަރުންނަށް ކުރިއަށް ގެންދިޔަ މި ކޭމްޕަކީ ކުރެންދޫ ޕޮލިހާއި އެ ސުކޫލު ގުޅިގެން ކުރިއަށް ގެންދިޔަ ކޭމްޕެކެވެ.

މި ކޭމްޕުގައި، ލީޑަރޝިޕްގެ މުހިންމުކަމާއި، ކާމިޔާބު ލީޑަރަކަށް ވުމަށް ކުރަންޖެހޭ މަސައްކަތްތަކުގެ އިތުރުން ވަގުތު މެނޭޖްކުރާނެ ގޮތްތައް ކިޔައިދީފައިވެއެވެ. އަދި ބޭސިކް ފަސްޓް އެއިޑްގެ މައުލޫމާތާއި، ދިރިއުޅުމުގެ ރިވެތި އާދަކާދަތަކުގެ އިތުރުން އަހުލާގު ރަނގަޅު ދަރިވަރުންގެ ގޮތުގައި ދެމިތިބުމަށް ސަމާލުކަންދޭންޖެހޭ ކަންކަމާ ގުޅޭގޮތުން ވެސް މައުލޫމާތު ދީފައިވެއެވެ.

މީގެ އިތުރުން، ‘މުސްލިމް ލީޑަރުން’ ގެ މާނައާއި މަގާމާ ގުޅޭގޮތުން ދަރިވަރުންނަށް ދީނީ ނަސޭހަތް ދީފައިވެއެވެ. އަދި ދަރިވަރުންގެ މެދުގައި އެކުވެރިކަމާއި އެއްބައިވަންތަކަން އާލާކުރުމުގެ ގޮތުން ޓީމް ބިލްޑިންގ ހަރަކާތްތަކެއް ވެސް ވަނީ ކުރިއަށް ގެންގޮސްފައެވެ.

މި ކޭމްޕު ފުރިހަމަކުރި ދަރިވަރުންނަށް ސެޓްފިކެޓާއި ކޭމްޕު ކުރިއަށް ގެންދިޔުމުގައި އެހީތެރިކަން ފޯރުކޮށްދެއްވި ފަރާތްތަކަށް ހަނދާނީ ލިޔުމާއި، ފިލާ ހަވާލުކޮށްދެއްވީ ކުރެންދޫ ސުކޫލުގެ ޕްރިންސިޕަލްއެވެ. މި ކޭމްޕު ނިންމުމުގެ ރަސްމިއްޔާތުގައި ޅ. އަތޮޅު ކޮމާންޑަރު އިންސްޕެކްޓަރ އޮފް ޕޮލިސް ޢަލީ ނަސީރުއާއި ކުރެންދޫ ޕޮލިހުގެ މުވައްޒަފުންނާއި ދަރިވަރުންގެ އިތުރުން ބެލެނިވެރިން ބައިވެރިވިއެވެ.

މި ކޭމްޕުގެ ތެރެއިން އެ ސުކޫލުގެ ބެލެނިވެރިންނަށް މައުލޫމާތު ދިނުމުގެ ސެޝަނެއް ކުރިއަށް ގެންގޮސްފައިވެއެވެ. މި ސެޝަންގައި، ކާމިޔާބު ބެލެނިވެރިޔަކަށް ވުމަށް ކުރެވިދާނެ ކަންކަމާއި، ދަރިން ތަރުބިއްޔަތު ކުރުމުގައި ވިސްނަންޖެހޭ މުހިންމު ކަންކަމަށް އަލިއަޅުވައި މައުލޫމާތު ދީފައިވެއެވެ. އަދި ދަރިން ބޮޑުވަމުން އަންނައިރު ބެލެނިވެރިންގެ ދައުރާއި، އަދާކުރަންޖެހޭ ޒިންމާތަކާ ގުޅޭގޮތުން މައުލޫމާތު ދީފައިވެއެވެ.