ލޮބުވެތި އެންމެހައި ދިވެހި ރައްޔިތުން،

السَّلامُ عَلَيْكُم ورَحْمَةُ اللهِ وَبَرَكاتُهُ.

ކޮންމެ އަހަރެއްގެވެސް އޮކްޓޫބަރު މަހަކީ، ސައިބަރ ވެށީގެ ރައްކާތެރިކަމަށް އާންމުން ހޭލުންތެރިކުރުވުމަށާއި، ޑިޖިޓަލް ދުނިޔޭގައި ކުރިމަތިވާ ނުރައްކާތަކުން ސަލާމަތްވުމުގެ މުހިންމުކަން ހަނދާންކޮށްދިނުމުގެ ގޮތުން، ބައިނަލްއަގުވާމީ ފެންވަރުގައި ފާހަގަކުރާ ސައިބަރ ސެކިއުރިޓީ އެވެއަރނަސް މަހެވެ.

މި މުހިންމު މުނާސަބަތުގައި، ލޮބުވެތި އެންމެހައި ދިވެހި ރައްޔިތުންނަށް މި މެސެޖު ފޯރުކޮށްދިނުމަކީ އަޅުގަނޑަށް ލިބޭ ނުހަނު ބޮޑު އުފަލެކެވެ.
 

މިއަދު އަޅުގަނޑުމެންގެ މި ލޮބުވެތި ގައުމު މިވަނީ، ޓެކްނޮލޮޖީގެ ދާއިރާއިން ފާހަގަކޮށްލެވޭ ފަދަ ބޮޑެތި ކުރިއެރުންތަކެއް ހޯދާފައެވެ. ރާއްޖޭގެ އާބާދީގެ ގާތްގަނޑަކަށް 85 އިންސައްތަ މީހުން އިންޓަރނެޓާއި ޒަމާނީ ޑިޖިޓަލް ވަސީލަތްތައް ބޭނުންކުރަމުންދާއިރު، އަޅުގަނޑުމެންގެ މުޖުތަމައަކީ ޑިޖިޓަލް ގޮތުންވެސް ގުޅިލާމެހިފައިވާ މުޖުތަމައެކެވެ.
 

މި ޓެކްނޮލޮޖީގެ ސަބަބުން ދިރިއުޅުމަށް އެތަކެއް ލުއިފަސޭހަކަމެއް ލިބިގެންދިޔަ ނަމަވެސް، އިންޓަރނެޓްގެ ޒަރީއާއިން ކުރިމަތިވާ ތަފާތު ނުރައްކާތައް ފެތުރިގެންދާ ދުވެލިވެސް މިވަނީ އެތައް ގުނައަކަށް ހަލުވިވެފައެވެ. އޭގެ ނަތީޖާއެއްގެ ގޮތުން، ވަކިވަކި ފަރުދުންނާއި ވިޔަފާރިތަކުގެ އިތުރުން ދައުލަތުގެ މުއައްސަސާތައްވެސް، ސައިބަރ ކުށްތަކުގެ ނުރައްކަލަށް ހުށަހެޅުމުގެ ފުރުސަތު މިއަދު މިވަނީ އިންތިހާއަށް އިތުރުވެގެން ގޮސްފައެވެ.
 

ސަރުކާރުން ފޯރުކޮށްދޭ ހިދުމަތްތަކާއި، މާލީ މުއާމަލާތްތަކާއި، ވިޔަފާރިތަކުގެ އިތުރުން އަޅުގަނޑުމެންގެ ޒާތީ ދިރިއުޅުމުގެ ކަންކަން ޑިޖިޓަލް ވަމުންދާއިރު، މަކަރާއި ހީލަތުގެ މަޅީގައި ރައްޔިތުން ޖައްސައި، ކުށްކުރުމަށް ސައިބަރ ވެށީގައި ފަހިވާ ފުރުސަތުތައްވެސް މިދަނީ އިތުރުވަމުންނެވެ. އެހެންކަމުން، ތަރައްގީއާއި ޒަމާނީ ބަދަލުތަކުގެ ހަގީގީ މަންފާ ހާސިލުކުރެވޭނީ، ކޮންމެ ފަރުދަކުމެ އަދި ކޮންމެ މުއައްސަސާއަކުންވެސް ޑިޖިޓަލް ރައްކާތެރިކަމަށް ފާރަވެރިވެ، ދުރާލައި ހޭލުންތެރި ފިޔަވަޅުތަކެއް އަޅައިގެންނެވެ.
 

ހިތާމައާއެކު ފާހަގަކުރަންޖެހޭ ހަގީގަތަކީ، މިއަހަރުގެ ފުރަތަމަ ހަމަސްދުވަހުގެ ތެރޭގައި އެކަނިވެސް ދިވެހި ފުލުހުންގެ ޚިދުމަތަށް ރިޕޯޓްކޮށްފައިވާ ސައިބަރ ކުށުގެ މައްސަލަތަކުގެ އަދަދު، ވޭތުވެދިޔަ އަހަރުގެ އެ މުއްދަތާ އަޅާބަލާއިރު ދެގުނައަށް އިތުރުވެފައިވާ ކަމެވެ. މި މައްސަލަތަކުގެ ތެރެއިން 68 އިންސައްތައަކީ ސޯޝަލް މީޑިއާ މެދުވެރިކޮށް ހިންގާފައިވާ ކުށްތަކެވެ. މީގެއިތުރުން، އާޓިފިޝަލް އިންޓެލިޖެންސް ފަދަ އަލަށް ތައާރަފުވަމުން އަންނަ ޓެކްނޮލޮޖީ ނަހަމަ ގޮތުގައި ބޭނުންކޮށްގެން، ސައްހަނޫން މެސެޖުތަކާއި، އަޑާއި، ވީޑިއޯ އުފައްދައި، ރައްޔިތުން މަޅީގައި ޖެއްސުމަށް ނުރައްކާތެރި އުކުޅުތައް ކުށްވެރިން ދަނީ ބޭނުންކުރަމުންނެވެ. މިފަދަ ކަންކަމަކީ ހަމައެކަނި ވަކިވަކި ފަރުދުންގެ މާލީ އަދި ޒާތީ ރައްކާތެރިކަމަށް އޮތް ގޮންޖެހުމެއް ނޫނެވެ. މިއީ މުއައްސަސާތަކުގެ އިތުބާރާއި، ގައުމުގެ އިގްތިސާދީ ހަރަކާތްތަކާއި، އަދި މުޅި ގައުމީ ސަލާމަތާ ސީދާ ގުޅިފައިވާ ކަމެކެވެ.

ފުލުހުންގެ ޚިދުމަތަށް ހުށަހެޅޭ މިފަދަ މައްސަލަތަކަށް ނަޒަރު ހިންގާއިރު، މިއިން ކޮންމެ ކަމެއްގެވެސް ފާހަގަކުރެވެނީ، ހޭލުންތެރިކަން ކުޑަވުމާއި، ފަރުވާކުޑަ އަމަލެއްގެ ސަބަބުން ވެވޭ އިހުމާލެވެ. ސައްހަކަން ކަށަވަރުނުވާ ލިންކުތަކަށް ފިތުމާއި، ޒާތީ މައުލޫމާތާއި ވަން-ޓައިމް ޕާސްވޯޑް ފަދަ ސިއްރު ކޯޑުތައް އެހެން ފަރާތްތަކާ ހިއްސާކުރުމާއި، އަދި އޮންލައިންކޮށް މުއާމަލާތްކުރާއިރު ކާކުކަން ކަށަވަރުނުކޮށް އިތުބާރުކުރުމަކީ، މިފަދަ ކުށްތަކުގައި ޖެހުމަށް ދިމާވާ މައިގަނޑު ސަބަބުތަކެވެ.

ސައިބަރ ކުށްތައް ހުއްޓުވުމަށާއި، މިފަދަ މައްސަލަތަކުގެ ތަހުގީގުތައް މިހާރަށްވުރެ ހަރުދަނާކޮށް ކުރިއަށް ގެންދިއުމަށްޓަކައި، ދިވެހި ފުލުހުންގެ ޚިދުމަތުން ދަނީ އެންމެ ޒަމާނީ ވަސީލަތްތަކާއި އާލާތްތައް ހޯދައި، ފުލުހުންގެ ފަންނީ ގާބިލުކަން އިތުރުކުރުމުގެ މަސައްކަތް މެދުކެނޑުމެއްނެތި ފުޅާކުރަމުންނެވެ. ހަމައެއާއެކު، ރައްޔިތުން މިފަދަ ކަންކަމަށް ފާރަވެރިކުރުވައި، ޑިޖިޓަލް ރައްކާތެރިކަމަށް ހޭލުންތެރިކުރުވުމުގެ ޕްރޮގްރާމްތައް މުޅި ރާއްޖެއަށް އަމާޒުކޮށްގެން ދަނީ ހިންގަމުންނެވެ.

އެހެންނަމަވެސް، ސައިބަރ ވެށީގެ ރައްކާތެރިކަން ކަށަވަރުކުރުމަކީ ހަމައެކަނި ގާނޫނު ތަންފީޒުކުރާ އިދާރާއަކުން ކުރާ މަސައްކަތުން އެކަނި ހާސިލުކުރެވޭނެ ކަމެއް ނޫން ކަމެވެ. މިއީ މުޖުތަމައުގެ ކޮންމެ ފަރުދެއްގެވެސް އަދި ކޮންމެ މުއައްސަސާއެއްގެވެސް ހިއްސާއާއި ޒިންމާ އެކުލެވިގެން މެނުވީ ހަސީލު ނުކުރެވޭނެ ކަމެކެވެ.

ފަރުދީ ގޮތުން ބަލާއިރު، އެކައުންޓްތަކުގައި ވަރުގަދަ ޕާސްވޯޑާއި، "ޓޫ-ފެކްޓަރ އޮތެންޓިކޭޝަން" ބޭނުންކުރުމަށާއި، އޯ.ޓީ.ޕީ އާއި ޒާތީ މައުލޫމާތު އެއްވެސް އެހެން ފަރާތަކާ ހިއްސާނުކުރުމަށް ސަމާލުވާންޖެހެއެވެ. އަދި އޮންލައިންކޮށް ފެންނަ ޚަބަރުތަކާއި މައުލޫމާތުގެ ސައްހަކަން ކަށަވަރުކުރުމެއްނެތި ފެތުރުމުން ދުރުހެލިވުމަށާއި، ކުށެއްގެ ޝިކާރައަކަށް ވެއްޖެނަމަ ނުވަތަ ޝައްކުކުރެވޭ ކަމެއް ފެނިއްޖެނަމަ، ލަސްނުކުރައްވައި ފުލުހުންގެ ޚިދުމަތަށް ރިޕޯޓްކުރެއްވުމަކީ ކޮންމެހެން މުހިންމު ކަމެކެވެ.

ހަމައެއާއެކު، ދައުލަތުގެ މުއައްސަސާތަކާއި ވިޔަފާރިތަކުންވެސް ޑިޖިޓަލް ޑޭޓާގެ ރައްކާތެރިކަމަށް ހާއްސަ އިސްކަމެއް ދޭންޖެހެއެވެ. ޚިދުމަތް ދިނުމަށް ބޭނުންވާ މިންވަރަށްވުރެ އިތުރަށް އާންމުންގެ ޒާތީ މައުލޫމާތު އެއްނުކުރުމާއި، އެ މައުލޫމާތަކީ އަމާނާތެއްގެ ގޮތުގައި ބަލައިގަނެ ރައްކާތެރިކުރުމަކީ މުއައްސަސާތަކުގެ ޒިންމާއެކެވެ. މީގެއިތުރުން، އައި.ޓީ ނިޒާމުތައް އަބަދުވެސް ރައްކާތެރިކޮށް އަޕްޑޭޓްކުރުމާއި، މުވައްޒަފުންނަކީ ސައިބަރ ނުރައްކާތަކަށް ލޯހުޅުވިފައިވާ ބަޔަކަށް ހެދުމުގެ އިތުރުން، ސައިބަރ ހަމަލާއެއް ނުވަތަ ޑޭޓާ ބްރީޗެއް ކުރިމަތިވެއްޖެ ހާލަތުގައި، ވަގުތުން ފިޔަވަޅުއަޅައި ކަމާބެހޭ ފަރާތްތަކަށް ރިޕޯޓްކުރުމަކީ މުއައްސަސާތަކުގެ އިތުބާރު ދެމެހެއްޓުމަށްޓަކައި ކޮންމެހެން އަދާކުރަންޖެހޭ ޒިންމާއެކެވެ.

މި ހިނގާ އޮކްޓޫބަރު މަހުގެ ތެރޭގައި، ވެރިރަށް މާލެއާއި އަތޮޅުތަކުގައި ދިވެހި ފުލުހުންގެ ޚިދުމަތުން ކުރިއަށްގެންދާ ހޭލުންތެރިކަމުގެ އެކި ހަރަކާތްތަކުގައި އާންމު ރައްޔިތުން ފުރިހަމައަށް ބައިވެރިވެވަޑައިގަތުމަކީ އަޅުގަނޑުގެ ވަރަށް ބޮޑު އެދުމެކެވެ. ސައިބަރ ސެކިއުރިޓީއާ ގުޅޭ މި މުހިންމު ވާހަކަތަކަކީ ކޮންމެ އާއިލާއެއްގެ ތެރޭގައިވެސް ދެކެވެންޖެހޭ ވާހަކަތަކެކެވެ. ދަރިންނަށް ރައްކާތެރިކަމާއެކު އިންޓަނެޓް ބޭނުންކުރާނެ ގޮތް އުނގަންނައިދީ، އެކުދިން އޮންލައިންކޮށް ގުޅުންބާއްވަނީ ކޮން ބަޔަކާތޯ ބަލައި، ބެލެނިވެރިން އަބަދުވެސް ސަމާލުވާންޖެހެއެވެ. އަދި ހާއްސަކޮށް، އާއިލާގައި ތިއްބެވި އުމުރުން ދުވަސްވީ ބޭފުޅުންނަކީ މިފަދަ ކުށްތަކަށް ފަސޭހައިން ހުށަހެޅިދާނެ ބަޔަކަށްވުމާއެކު، އެބޭފުޅުންނަށް ވިސްނައިދީ، އެހީތެރިވެދީ، ޑިޖިޓަލް ރައްކާތެރިކަން ކަށަވަރުކޮށްދިނުމަކީ އަޅުގަނޑުމެން ކޮންމެ މީހެއްގެވެސް ކޮނޑުގައި އެޅިފައިވާ އާއިލީ އަދި އިޖުތިމާއީ ޒިންމާއެކެވެ.

އަޅުގަނޑުމެން އެންމެން ގުޅިގެން ކުރާ މަސައްކަތުން، އަޅުގަނޑުމެންގެ މި ލޮބުވެތި ދިވެހިރާއްޖެއަކީ ޑިޖިޓަލް ޒަމާނުގައިވެސް ރައްކާތެރި އަދި އަމާން މުޖުތަމައެއްގެ ގޮތުގައި ބިނާކުރުމަށް އަޒުމު ކަނޑައަޅަމާ ހިނގާށެވެ!

މާތް ﷲ، އަޅުގަނޑުމެންގެ މި ލޮބުވެތި ގައުމު، އެންމެހައި ނުރައްކާތަކުން ރައްކާތެރިކުރައްވަވައި، ރައްޔިތުންނަށް އަމާންކަމާއި ބާއްޖަވެރިކަން މިންވަރުކުރައްވާށިއެވެ. އާމީން.