ގެވެށި އަނިޔާއިން ރައްކާތެރިކުރުވުމަށް ނ. މާފަރު ސުކޫލު ބެލެނިވެރިންނަށް މައުލޫމާތު ދިނުމުގެ ސެޝަނެއް ކުރިއަށް ގެންގޮސްފިއެވެ.

މި މަހު 18 ވަނަ ދުވަހު ކުރިއަށްގެންދިޔަ މި ސެޝަނަކީ މާފަރު ޕޮލިހާއި މާފަރު ސުކޫލު ގުޅިގެން ކުރިއަށްގެންދިޔަ ސެޝަނެކެވެ.

މި ސެޝަންގައި ގެވެށި އަނިޔާއާއި ގެވެށި ގުޅުމުގެ މާނަ ކިޔައިދީފައިވެއެވެ. އަދި ގެވެށި އަނިޔާގެ ސަބަބުން ކުދިންގެ ނަފުސާނީ ދުޅަހެޔޮކަމަށް ބުރޫއެރުމާއި، ސުކޫލުގެ ކިޔެވުމަށާއި އިޖުތިމާއީ މާހައުލަށް ކުރާ ނޭދެވޭ އަސަރުތަކާ ގުޅޭގޮތުން މައުލޫމާތު ހިއްސާކޮށްފައިވެއެވެ. އަދި މިފަދަ މައްސަލަތައް ސިއްރުނުކޮށް ކަމާބެހޭ ފަރާތްތަކަށް އެންގުމަށާއި، މިފަދަ އަނިޔާތަކުގެ ސަބަބުން އާއިލާގެ ހަމަޖެހުން ގެއްލި ބިރުވެރިކަމެއްގެ ތެރޭގައި ދިގު މުއްދަތަކަށް ދިރިއުޅެންޖެހޭކަން ފާހަގަކޮށްފައިވެއެވެ. އަދި އަނިޔާ ލިބޭ ފަރާތްތަކުން ވީ އެންމެ އަވަހަކަށް ނަފުސާނީ އަދި ބޭނުންވާ އެހެނިހެން އެހީތެރިކަން ހޯދުމަށް ވަނީ އިރުޝާދުދީފައެވެ.

މީގެ އިތުރުން، ގެވެށި އަނިޔާ ލިބޭ ފަރާތްތަކަށް ގާނޫނީ ގޮތުން ލިބިދޭ ރައްކާތެރިކަން ހޯދުމަށްޓަކައި، ކޯޓު މެދުވެރިކޮށް ރައްކާތެރިކުރުމުގެ އަމުރަށް އެދޭވޭނެ ގޮތްތަކާއި އެފަދަ ހާލަތްތަކުގައި އަމަލުކުރަންޖެހޭ ގޮތްތައް ވަނީ ކިޔައިދީފައެވެ. އަދި މިފަދަ މައްސަލަތައް ލަސްނުކޮށް ކަމާބެހޭ އިދާރާތަކަށް ރިޕޯޓުކުރުމުގައި ގެންގުޅެންޖެހޭ އެންމެހައި އިރުޝާދުތައް ވެސް ވަނީ ހިއްސާކޮށްފައެވެ.

މިފަދަ ސެޝަންތަކުގެ ސަބަބުން ނަފުސާނީ އަދި އިޖުތިމާއީ ދުޅަހެޔޮކަން އިތުރުވެ، ގެވެށި އަނިޔާގެ ސަބަބުން އާއިލާތަކަށާއި ދަރިންނަށް ކުރާ ނޭދެވޭ އަސަރުތަކުން ސަލާމަތްވުމަށް ބޭނުންވާ ފަރުވާއާއި އެހީތެރިކަން ހޯދުމުގެ މުހިންމުކަން ދެނެގަނެވޭނެއެވެ. އަދި މިފަދަ އަނިޔާތަކުން ސަލާމަތްވެފައިވާ ރައްކާތެރި، ހަމަޖެހޭ މުޖުތަމައެއް ބިނާކުރުމަށް މުޖުތަމައު ހޭލުންތެރިކޮށް ބާރުވެރިކުރުވުމަށް މަގުފަހިވެގެންދާނެއެވެ.