ބ. ގޮއިދޫ ސުކޫލު ދަރިވަރުންނާއި ބެލެނިވެރިންނަށް ހޭލުންތެރިކުރުމުގެ ސެޝަންތަކެއް ކުރިއަށް ގެންގޮސްފިއެވެ. މި ސެޝަންތަކުގައި މައުލޫމާތު ހިއްސާކޮށްފައި ވަނީ ސައިބަރ ކްރައިމް އަދި ސައިބަރ ބުލީއިންގގެ މައްސަލަތަކުން ރައްކާތެރިކުރުވުމަށެވެ.

މި މަހުގެ 19 ވަނަ ދުވަހު ގޮއިދޫ ސުކޫލުގައި ކުރިއަށް ގެންދިޔަ މި ސެޝަންތަކަކީ، އެ ރަށު ޕޮލިހާއި ސުކޫލު ގުޅިގެން ކުރިއަށް ގެންދިޔަ ސެޝަންތަކެކެވެ. މި ސެޝަންތައް ކުރިއަށް ގެންގޮސްފައިވަނީ އެ ސުކޫލުގެ ގުރޭޑު 7 އިން މަތީގެ ދަރިވަރުންނަށާއި ބެލެނިވެރިންނަށެވެ.

އެގޮތުން، ދަރިވަރުންނަށް ކުރިއަށްގެންދިޔަ ސެޝަންގައި، ރައްކާތެރިކަމާއެކު އިންޓަނެޓާއި ސޯޝަލް މީޑިޔާ ބޭނުންކުރާނެ ގޮތްތަކާއި އޮންލައިން ނުރައްކާތަކާ ގުޅޭ މައުލޫމާތު ހިއްސާކޮށްފައިވެއެވެ. އަދި ސައިބަރ ބުލީކުރުމަކީ ކޮބައިކަން ސާފުކޮށްދީ، ބުލީކުރުމުގެ ސަބަބުން ދަރިވަރުންގެ ނަފުސާނީ ދުޅަހެޔޮކަމަށާއި ދިރިއުޅުމަށް ކުރާނެ ނޭދެވޭ އަސަރުތައް ކިޔައިދީފައިވެއެވެ. މީގެއިތުރުން، އެއް ދަރިވަރަކު އަނެއް ދަރިވަރަކާ އޮންނަ އެކުވެރިކަމުގެ ގުޅުން ބަދަހިކޮށް، އެކުވެރި އަދި ރަހުމަތްތެރި މާހައުލެއް ސުކޫލުގައި ގާއިމުކުރުމަށާއި ބުލީގެ ޝިކާރައަކަށްވާ ދަރިވަރުންނަށް އެހީތެރިވުމަށާއި، އެފަދަ ކަމެއް ފެނިއްޖެ ހާލަތެއްގައި އަމަލުކުރަންޖެހޭ ރަނގަޅު ގޮތްތަކާ ބެހޭގޮތުން ވެސް ދަރިވަރުންނަށް މައުލޫމާތު ދީފައިވެއެވެ. އަދި އޮންލައިންކޮށް ދިމާވާ މީހުންނަށް ތިމާގެ ޒާތީ މައުލޫމާތު ހިއްސާނުކުރުމަށާއި މިފަދަ ކަންކަމަށް ދަރިވަރުން ހާއްސަ ސަމާލުކަމެއް ދިނުމަށް ނަސޭހަތްތެރިވެފައިވެއެވެ. އަދި ދަރިވަރުން ގެންގުޅޭ މޯބައިލް ފޯނާއި ޓެބްލެޓު ފަދަ ވަސީލަތްތަކުގެ ސެކިޔުރިޓީ ވަރުގަދަ ކުރުމާއެކު މި ތަކެތީގެ ޕާސްވޯޑު އެއްވެސް ފަރާތަކަށް ހިއްސާނުކުރުމަށް ވެސް މި ސެޝަންގައި އިރުޝާދު ދީފައިވެއެވެ.

ބެލެނިވެރިންނަށް މައުލޫމާތު ދިނުމަށް ގެންދިޔަ ސެޝަންގައި، ދަރިން އިންޓަނެޓްގައި ވަގުތު ހޭދަކުރާއިރު އެކުދިން ކުރާ ކަންކަން ގާތުން ބަލައި ރަނގަޅަށް މޮނިޓަރކޮށް އޮންލައިންކޮށް ކުދިން ހޭދަކުރާ ވަގުތުތައް ކޮންޓްރޯލްކުރާނެ ގޮތްތައް ކިޔައިދީފައިވެއެވެ. އަދި އިންޓަނެޓް މެދުވެރިކޮށް ހިންގާ ކުށްތަކާއި ބުލީކުރުމުގެ އަމަލުތަކުން ދަރިން ރައްކާތެރިކުރުވުމަށް ބެލެނިވެރިން ހޭލުންތެރިކުރުވުމާއި އޮންލައިންކޮށް ދިމާވާ މައްސަލަތައް މައިންބަފައިންނާ ހިއްސާކުރުމަށް ކުދިންނަށް ބާރުއެޅުމަށް ނަސޭހަތްތެރިވެފައިވެއެވެ. އަދި އިންޓަނެޓް މެދުވެރިކޮށް ކުރިމަތިވެދާނެ ނުރައްކާތަކާއި ފުރައްސާރަތަކުން ރައްކާތެރިވުމަށާއި އެފަދަ ފުރުސަތެއް އެއްވެސް ފަރާތަކަށް ނުދިނުމަށް ސަމާލުވުމަށް މި ސެޝަންގައި މައުލޫމާތު ހިއްސާކޮށްފައިވެއެވެ.

ސައިބަރ ކްރައިމްގެ މައްސަލަތަކުން ރައްކާތެރިވުމަށް ބެލެނިވެރިން ހޭލުންތެރިވެ ތިބުމަކީ ދަރިންގެ ރައްކާތެރިކަމަށް އެޅޭ މުހިންމު ފިޔަވަޅެކެވެ.