އިންޑިއާގެ ހައިދަރުއާބާދުގައި ހުންނަ ސަރްދާރު ވަލްލަބްބާއީ ޕަޓޭލް ނޭޝަނަލް ޕޮލިސް އެކަޑަމީގައި ހިންގި އިންޑިއަން ޕޮލިސް ސަރވިސް ޕްރޮބޭޝަނާރސް ކޯސް 78 ފުރިހަމަކުރި ދިވެހި ފުލުހުންގެ ޚިދުމަތުގެ ފަސް އޮފިސަރުންނާ ކޮމިޝަނަރ އޮފް ޕޮލިސް އަޙްމަދު މުޙައްމަދު މިއަދު ބައްދަލުކުރައްވައިފިއެވެ۔
އައިޕީއެސް ޕްރޮބޭޝަނާރސް ކޯސް 78 ފުރިހަމަކުރެއްވި ފަސް އޮފިސަރުންނަކީ ސަބް އިންސްޕެކްޓަރ އޮފް ޕޮލިސް ޢަބްދުލްޢަޒީޒް ޒަކަރިއްޔާ އާއި ސަބް އިންސްޕެކްޓަރ އޮފް ޕޮލިސް އަޙްމަދު އަޞްލަޙް އާއި ސަބް އިންސްޕެކްޓަރ އޮފް ޕޮލިސް މަރްޔަމް ލިފްޝާ އާއި ސީނިއަރ ސާޖަންޓް މުޖުތަބާ ނަސީމް އަދި ސީނިއަރ ސާޖަންޓް ޢިމްރާން ޢަބްދުﷲ އެވެ.
މި ބައްދަލުކުރެއްވުމުގައި ކޮމިޝަނަރ އޮފް ޕޮލިސް ވަނީ، ބައިނަލްއަގުވާމީ ފެންވަރުގެ މިފަދަ ފަހުރުވެރި ތަމްރީނު ޕްރޮގްރާމެއް ކާމިޔާބުކަމާއެކު ފުރިހަމަކޮށް، އެނބުރި ޚިދުމަތަށް އައުމުން އެ ހުރިހާ އޮފިސަރުންނަށް މަރުހަބާ ދަންނަވާފައެވެ.
އަދި މި ތަމްރީނު ޕްރޮގްރާމުގައި އުނގެނުނު ހުނަރުތަކާއި ހޯދި ތަޖުރިބާގެ ބޭނުން ހިފައި، ދިވެހި ފުލުހުންގެ ޚިދުމަތަށާއި، ގައުމަށާއި އަދި ރައްޔިތުންނަށް ހިދުމަތްކުރުމުގައި އެންމެ ފައިދާހުރި ގޮތުގައި މަސައްކަތްކުރުމަށް ކޮމިޝަނަރ އެދިވަޑައިގެންނެވިއެވެ. މީގެއިތުރުން، މުއައްސަސާގެ އެހެން މުވައްޒަފުންނަށް އަމަލާއި ސުލޫކުން ނަމޫނާ ބަޔަކަށް ވުމަށްވެސް ކޮމިޝަނަރ އޮފިސަރުންނަށް އިލްތިމާސްކުރެއްވިއެވެ.
2025 ޑިސެންބަރު އިން 2026 ނޮވެމްބަރު މަހުގެ ނިޔަަލަށް ކުރިއަށް ގެންދިޔަ ދިހަ މަސްދުވަހުގެ މި ތަމްރީނު ޕްރޮގްރާމުގެ ސަބަބުން، ފުލުސް އޮފިސަރެއްގެ ހައިސިއްޔަތުން އަދާކުރަންޖެހޭ މަސްއޫލިއްޔަތުތައް ހަރުދަނާގޮތެއްގައި އަދާކުރުމަށް ބޭނުންވާ އިލްމާއި ހުނަރު ވަނީ ލިބިގެންގޮސްފައެވެ. އެގޮތުން، ސެންސިޓައިޒޭޝަން، އޮރިއެންޓޭޝަން އެންޑް ކޮމްޕިޓެންސީގެ މެޓްރިކްސް މެދުވެރިކޮށް ކެޕޭސިޓީ ބިލްޑިންގ އިތުރުކުރުން، ޕްރޮފެޝަނަލް އިލްމާއި ވިސްނުން ތަރައްގީކުރުން، އޮގަނައިޒޭޝަނަލް އަދި ކޮމިއުނިޓީ ސްކިލްސް ތަރައްގީކުރުމާއި އިންސާނީ އަހުލާގާއި ހައްގުތަކާއި ވިސްނުން ތަރައްގީކުރުމަށް މަގުފަހިވާނެ ފަދަ ތަމްރީނުތައް މި ޕްރޮގްރާމްގައި ހިމެނެއެވެ.
އައިޕީއެސް ޕްރޮބޭޝަނާސް ކޯހަކީ އިންޑިއާގެ އެކި ސްޓޭޓްތަކުން ހޮވޭ ފަރާތްތަކަށް މަރުކަޒީކޮށް ހިންގޭ ތަމްރީނު ޕްރޮގްރާމެކެވެ. މި ތަމްރީނު ޕްރޮގްރާމުގައި ބައިވެރިވުމުގެ ފުރުސަތު 1998 ވަނަ އަހަރުން ފެށިގެން ކޮންމެ އަހަރަކު ވެސް ދިވެހި ފުލުހުންނަށް ދަނީ ލިބެމުންނެވެ.
