އިސްކަންދަރު ސުކޫލު ބެލެނިވެރިންނަށް މައުލޫމާތު ދިނުމުގެ ސެޝަނެއް ކުރިއަށް ގެންގޮސްފިއެވެ. އެ ސުކޫލުގެ ގުރޭޑު 6އިން 9 އާ ދެމެދުގެ ބެލެނިވެރިންނަށް ކުރިއަަށް ގެންދިޔަ މި ސެޝަންގައި މައުލޫމާތު ދީފައިވަނީ “ސަބްސްޓެންސް އެބިއުސް” އަދި “ރައްކާތެރިގޮތުގައި އިންޓަނެޓް ބޭނުންކުރުން” މައުލޫގެ ދަށުންނެވެ.

ނޮވެމްބަރު 2 ވަނަ ދުވަހު ކުރިއަށް ގެންދިޔަ މި ސެޝަނަކީ ގަލޮޅު ޕޮލިސް ނެއިބަހުޑް އެންޑް ކްރައިމް ޕްރިވެންޝަނާއި ސައިބަރ ކްރައިމް ސެންޓަރު އަދި ޑްރަގް އެންފޯސްމަންޓް ގުޅިގެން ކުރިއަށް ގެންދިޔަ ސެޝަނެކެވެ.

މި ސެޝަންގައި، މަސްތުވާތަކެތީގެ ވަބާއިން ކުދިން ރައްކާތެރިކުރުމަށް ކުރެވިދާނެ ކަންތައްތަކާއި މިފަދަ ކަމެއް ދިމާވެއްޖެނަމަ ކުދިންގެ ކިބައިން ފެންނާނެ އަލާމާތްތަކާއި، އިތުރަށް ކުދިން ގޯސްވިޔަނުމަށް ކުރެވިދާނެ ކަންކަމާ ގުޅޭގޮތުން މައުލޫމާތު ދީފައިވެއެވެ.

އަދި ކުދިން އިންޓަނެޓް ބޭނުންކުރާއިރު ބެލެނިވެރިން ސަމާލުކަންދޭންޖެހޭ ކަންކަމާއި، އިންޓަނެޓްގެ މެދުވެރިކޮށް މިހާރު ހިންގަމުންދާ ކުށްތަކާ އަދި ކުދިން ގެންގުޅޭ ފޯނާއި ޓެބްލެޓް ފަދަ ތަކެތި ބެލެނިވެރިން މޮނީޓަރކުރުމުގެ މުހިންމުކަން ކިޔައިދީ އަދި އުމުރާ ނުގުޅޭ ފަދަ މަންޒަރުތައް ކުދިންނަށް ނުފެންނާނޭހެން ކޮންޓްރޯލްކުރާނެ ގޮތްތައް ވެސް ކިޔައިދީ ހޭލުންތެރިކުރުވާފައިވެއެވެ.

އޭގެ އިތުރުން، ބެލެނިވެރިން ވެސް އިންޓަނެޓް ބޭނުންކުރާއިރު ވިސްނަންޖެހޭ ކަންކަމާއި އާންމުކޮށް ބޭނުންކުރާ އެޕްލިކޭޝަންތައް ރަނގަޅު ގޮތުގައި ބޭނުންކުރާނެ ގޮތްތަކުގެ މައުލޫމާތު ހިއްސާކޮށްފައިވެއެވެ. މި ސެޝަންގައި 122 ބެލެނިވެރިން ބައިވެރިވިއެވެ.