މަގުމަތީގެ ސަލާމަތާއި ރައްކާތެރިކަމާ ގުޅޭގޮތުން މައުލޫމާތު ދިނުމުގެ ޕްރޮގްރާމެއް ހދ. ނޮޅިވަރަންފަރުގައި ކުރިއަށް ގެންގޮސްފިއެވެ.
މި މަހު 10 ވަނަ ދުވަހު ކުރިއަށް ގެންދިޔަ އެ ޕްރޮގްރާމްގައި މައުލޫމާތު ދީފައިވަނީ ނޮޅިވަރަންފަރު ސުކޫލު ގުރޭޑު 4 އިން 9 އާ ދެމެދުގެ ދަރިވަރުންނަށާއި، ބެލެނިވެރިންގެ އިތުރުން ރަށުގެ މުއައްސަސާތަކުގެ މުވައްޒަފުންނަށެވެ.
ނޮޅިވަރަންފަރު ފުލުހުން ކުރިއަށް ގެންދިޔަ މި ޕްރޮގްރާމްގައި، މަގުމަތީގެ ސަލާމަތާއި ރައްކާތެރިކަމަށް ސުކޫލު ދަރިވަރުން އަހުލުވެރިކުރުވުމަށް މައުލޫމާތު ދީފައިވެއެވެ. އެގޮތުން، މަގުމަތީގައި އުޅޭއިރު ދަރިވަރުން ސަމާލުކަންދޭންޖެހޭ ކަންތައްތަކާއި، ރޭގަނޑު ބައިސްކަލު ދުއްވާއިރު ބައިސްކަލު ބައްތި ދިއްލުމަށާއި، އެކްސިޑެންޓު ހިނގިޔަ ނުދިނުމަށް ދަރިވަރުންނަށް ކުރެވޭނެ ކަންތައްތައް ކިޔައިދީފައިވެއެވެ. އޭގެ އިތުރުން، 18 އަހަރުން ދަށުގެ ކުދިން ސައިކަލު އަދި ބަގީ ފަދަ އުޅަނދު ނުދުއްވުމަށާއި ލައިސަންސް ނެތި އުޅަނދު ދުއްވުމަކީ ކުށެއްކަން ހަނދާންކޮށްދީފައިވެއެވެ.
ބެލެނިވެރިންނަށާއި، މުއައްސަސާތަކުގެ މުވައްޒަފުންނަށް ކުރިއަށް ގެންދިޔަ ސެޝަންގައި އެއްގަމު ދަތުރުފަތުރުގެ ގާނޫނާއި ގަވާއިދުތަކާ ބެހޭގޮތުން މައުލޫމާތު ދީފައިވެއެވެ. އަދި ގާނޫނުގައި ބަޔާންކޮށްފައިވާ ކަންކަން އުޅަނދުގައި ފުރިހަމަކޮށްގެން އުޅަނދު ދުއްވުމަށް އިލްތިމާސްކޮށްފައިވެއެވެ. އޭގެ އިތުރުން، ތިމާއާއި އަނެއްކުންގެ ސަލާމަތާއި ރައްކާތެރިކަން ކަށަވަރުކުރުމަށް، އެއްގަމު އުޅަނދު ދުއްވާއިރު ސަމާލުކަންދިނުމަށާއި އެކްސިޑެންޓްތައް މަދުކުރުމަށް ކުރެވޭނެ ކަންތައްތަކާ ބެހޭގޮތުން މައުލޫމާތު ދީފައިވެއެވެ.
