
ކާމިޔާބު ދަރިވަރު އަދި ޕޭރެންޓިންގ ސްކިލްސް ސެޝަންތަކެއް ދަނގެތީގައި ކުރިއަށް ގެންގޮސްފިއެވެ. ނޮވެމްބަރު 15 އިން 16 އަށް މި ސެޝަންތައް ކުރިއަށް ގެންގޮސްފައިވަނީ ދަނގެތީ ޕޮލިހާއި ޕަބްލިކް ޓްރަސްޓް އެންޑް ކޮންފިޑެންސް މެނޭޖްމަންޓް ގުޅިގެންނެވެ.
މި ސެޝަންތަކުގެ ތެރެއިން، ދަނގެތީ ސުކޫލު ގުރޭޑު 6 އަދި 7 ގެ ދަރިވަރުންނަށް ކުރިއަށް ގެންދިޔަ ސެޝަންގައި މައުލޫމާތު ދީފައިވަނީ “ކާމިޔާބު ދަރިވަރު” ގެ ނަމުގައެވެ. 42 ދަރިވަރުންނާއެކު ކުރިއަށް ގެންދިޔަ މި ސެޝަންގައި، ކާމިޔާބު ދަރިވަރަކަށް ވުމަށް ކުރެވޭނެ ކަންތައްތައް ކިޔައިދީފައިވެއެވެ. އަދި ތައުލީމީ ހަޔާތާއި ދިރިއުޅުމުގެ ކޮންމެ މައިދާނެއްގައިވެސް ކާމިޔާބު މީހަކަށް ވުމަށް ފުރާވަރު އުމުރުން ފެށިގެން މަސައްކަތްކުރުމުގެ ބޭނުންތެރިކަން ކިޔައިދީފައިވެއެވެ. އޭގެ އިތުރުން، ދަރިވަރުންގެ އަހުލާގީ މިންގަނޑުތައް އެންމެ ރަނގަޅުގޮތުގައި ހިފެހެއްޓުމަށް ކުރެވޭނެ ކަންތައްތައް ކިޔައިދީފައިވެއެވެ.

ބެލެނިވެރިންނަށް ކުރިއަށް ގެންދިޔަ ސެޝަންގައި މައުލޫމާތު ދީފައިވަނީ “ޕޭރެންޓިންގ ސްކިލްސް” އާ ބެހޭގޮތުންނެވެ. މި ސެޝަންގައި، ގުޅިގެން ދަރިން ތަރުބިއްޔަތުކުރުމާއި، ބެލެނިވެރިކަން ކުރުމުގައި ރިވެތި އަދަބުތައް ބޭނުންކުރުމުގެ މުހިންމުކަމާއި އެކަމުން ލިބޭނެ ފައިދާތައް ކިޔައިދީފައިވެއެވެ. އޭގެ އިތުރުން، ބެލެނިވެރިންގެ ފަރާތުން ދަރިންނަށް ރިވެތި ނަމޫނާ ދެއްކުމަށާއި، ކުދިންގެ ކަންކަން ގާތުން ބެލުމަށް އިރުޝާދު ދީފައިވެއެވެ.
މިފަދަ ސެޝަންތަކުގެ ސަަބަބުން، ދިރިއުޅުމުގެ ކަންކަމަށް ލޯހުޅުވި، ބެލެނިވެރިންނާއި ދަރިންގެ މެދުގައި އޮންނަ ގުޅުން ރަނގަޅުވެ އަދި އަހުލާގު ރަނގަޅު ހެޔޮލަފާ ޖީލެއް ބިނާކުރުމަށް މަގުފަހިވެގެންދާނެއެވެ.