
ނ. ފޮއްދޫގައި އަލަށް ހުޅުވުނު ފުލުހުންގެ މަރުކަޒުގައި މަސައްކަތްކުރާ ފުލުހުން، އެ ރަށުގެ ރައްޔިތުންނާ ގުޅިގެން ރައްޔިތުންނަށް ރައްކާތެރިކަން އިހުސާސްވާ ފަދަ ޚިދުމަތެއް މެދުނުކެނޑި ފޯރުކޮށްދެމުންދާނެ ކަމުގެ ޔަގީންކަން ކޮމިޝަނަރ އޮފް ޕޮލިސް އަޙްމަދު މުޙައްމަދު ދެއްވައިފިއެވެ.
ނ. ފޮއްދޫ ޕޮލިސް ސްޓޭޝަން ހުޅުވުމަށް އިއްޔެ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ކޮމިޝަނަރ އޮފް ޕޮލިސް ވިދާޅުވީ، ފޮއްދޫގެ ރައްޔިތުންނަކީ ފުލުހުންގެ ޚިދުމަތް ލޯތްބާއެކު ބަލައިގަންނަ އަދި ރަށުގައި ފުލުހުން ގާއިމުވެ ތިބުމަށް އެދޭ ބައެއްކަން ރަސްމިއްޔާތުގެ ހާޒިރީއާއި ރައްޔިތުންގެ އެއްބާރުލުމުން ހާމަވެގެންދާ ކަމަށެވެ. "އަޅުގަނޑު އުންމީދުކުރަނީ އިރާދަކުރެއްވިއްޔާމު މި ހުޅުވިގެންދާ ސްޓޭޝަނުގައި މިއަދު މިތާ މަސައްކަތްކުރާ ފުލުހުންނާއި މި ރަށު ރައްޔިތުންނާ ގުޅިގެން މި ރަށު ރައްޔިތުން އެދޭފަދަ ޚިދުމަތެއް މިތަނުގައި ފުލުހުން ތިބެގެން ރައްޔިތުންނަށް ދެމުންދާނެކަން. އެކަން އިރާދަކުރެއްވިއްޔާ މެދުނުކެނޑި ހަމަ އެގޮތުގައި ކުރިއަށްދާނެ،" ކޮމިޝަނަރ އޮފް ޕޮލިސް ވިދާޅުވިއެވެ.
ކުރީގެ އުސޫލުތަކަށް އަލިއަޅުއްވާލައްވަމުން ކޮމިޝަނަރ އޮފް ޕޮލިސް ފާހަގަކުރެއްވީ، މީގެ ކުރިން ފުލުހުންގެ ދާއިމީ މަރުކަޒުތައް ގާއިމުކުރުމުގައި އިސްކަންދެވިފައި އޮންނަނީ ނ. މަނަދޫއާއި ވެލިދޫ ފަދަ އާބާދީ ބޮޑެތި އަދި ކުށްކުރުން ގިނަ ރަށްރަށަށް އެކަނި ކަމަށެވެ. ނަމަވެސް ހިކުމަތްތެރިކަމާއި ވިސްނުންތެރިކަމާއެކު ސަރުކާރުގެ ބަޖެޓުން ރައްޔިތުންނަށް އެންމެ މުހިންމު ކަންކަމަށް އިސްކަންދިނުމުގެ ނަތީޖާއެއްގެ ގޮތުން، އާބާދީ ކުދި ރަށްރަށުގައިވެސް ފުލުހުންގެ ދާއިމީ މަރުކަޒުތައް ގާއިމުވެގެންދާކަން އެމަނިކުފާނު ފާހަގަކުރެއްވިއެވެ.
މި ސަރުކާރު ވެރިކަމާ ހަވާލުވިއިރު ނ. އަތޮޅުގެ ދެބައިކުޅަ އެއްބައި ރަށްރަށުގައި ފުލުހުން ގާއިމުވެފައި ނެތްކަން ފާހަގަކުރައްވައި ކޮމިޝަނަރ އޮފް ޕޮލިސް ވިދާޅުވީ، މިހާރު އެ ހުރިހާ ރަށެއްގައި ފުލުހުން ގާއިމުކުރެވި، ފުލުހުން ތިބޭނެ ދާއިމީ މަރުކަޒުތައް ހުޅުވެމުންދާ ކަމަށެވެ. ނ. މާފަރު ޕޮލިސް ސްޓޭޝަން ހުޅުވުމަށްފަހު ފޮއްދޫގައި ހުޅުވުނު މި މަރުކަޒަކީ ވޭތުވެދިޔަ ގާތްގަނޑަކަށް 26 ގަޑިއިރުގެ ތެރޭގައި ހުޅުވުނު ތިންވަނަ ޕޮލިސް ސްޓޭޝަންކަން އެމަނިކުފާނު ފާހަގަކުރެއްވިއެވެ. "މި ވޭތުވެދިޔަ ގާތްގަނޑަކަށް 26 ގަޑިއިރު ތެރޭގައި ފުލުހުންގެ މިގޮތަށް އަޅުގަނޑުމެން އިހުތިފާލުކުރާ، ހުޅުވާ ތިންވަނަ ޕޮލިސް ސްޓޭޝަން ނުވަތަ މަރުކަޒު ހުޅުވާ ވަގުތު. މިއީ ވަރަށް އުފާވެރި އިހުސާސެއް،" ކޮމިޝަނަރ ވިދާޅުވިއެވެ.

ނ. އަތޮޅުގެ ރައްޔިތުންނަކީ ޒަމާނުއްސުރެ އަމަންއަމާންކަމަށް ލޯބިކުރާ ބައެއްކަން ފާހަގަކުރައްވައި ކޮމިޝަނަރ އޮފް ޕޮލިސް ވިދާޅުވީ، މީގެ ގާތްގަނޑަކަށް 26 ނުވަތަ 27 އަހަރު ކުރިން އެ އަތޮޅުގައި އެއްވެސް ޕޮލިސް ސްޓޭޝަނެއް ނެތް ދުވަސްވަރުވެސް، ނ. އަތޮޅު ކޮމިޓީގެ ބަޖެޓުން ހަރަދުކޮށްގެން މަނަދޫގައި ފުލުހުންގެ މަރުކަޒެއް އަޅައި ފުލުހުން ގާއިމުކޮށްފައިވާ ކަމަށެވެ.
ދިވެހި ފުލުހުންގެ ޚިދުމަތުގެ ތަރައްގީއަށް ސަރުކާރުން ދެއްވާ އަހަންމިއްޔަތަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށާއި، އަމަލީ ގޮތުން ރަށްރަށަށް ވަޑައިގެން މި މަސައްކަތްތަކުގައި ބައިވެރިވެވަޑައިގަންނަވާތީ ހޯމް މިނިސްޓަރ ޢަލީ އިޙްސާނަށް ކޮމިޝަނަރ އޮފް ޕޮލިސް ޝުކުރު އަދާކުރެއްވިއެވެ. މީގެ އިތުރުން، މި ރަސްމިއްޔާތުގެ އިންތިޒާމުތައް ފުރިހަމަކުރުމުގައި ނ. ފޮއްދޫ ކައުންސިލާއި ރައްޔިތުން ދެއްވި އެހީތެރިކަމަށާއި ކީ ހޫނު މަރުހަބާއަށް އެމަނިކުފާނު ޝުކުރު އަދާކުރެއްވިއެވެ.
މި ރަސްމިއްޔާތުގައި ހޯމްލޭންޑް ސެކިއުރިޓީ، ލޭބަރ އެންޑް ޓެކްނޮލޮޖީ ޢަލީ އިޙްސާނާއި، ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީއާއި، އެމް.ޓީ.ސީ.ސީގެ ޑެޕިއުޓީ މެނޭޖިންގ ޑިރެކްޓަރ އަޙްމަދު މުބީނާއި، ފުލުހުންގެ ސީނިއަރ އެގްޒެކެޓިވް އޮފިސަރުންނާއި އެކި ރޭންކްތަކުގެ ފުލުހުންގެ އިތުރުން ނ. ފޮއްދޫ ކައުންސިލްގެ ރައީސާއި ގިނަ އަދަދެއްގެ ރައްޔިތުން ބައިވެރިވިއެވެ.